Ministri i Mbrojtjes, Pirro Vengu zhvilloi një vizitë në Regjimentin e Këmbësorisë së Veriut në Vaun e Dejës, i shoqëruar nga Shefi i Shtabit të Përgjithshëm të Forcave të Armatosura, gjenerallejtenant Arben Kingji, dhe Komandanti i Forcës Tokësore, gjeneralmajor Ilir Xhebexhia.
Gjatë takimit me rekrutët e rinj, Ministri Vengu theksoi angazhimin e Ministrisë së Mbrojtjes për përmirësimin e kushteve të shërbimit.
“Shumë shpejt, ju do të keni në dispozicion veshje dhe pajisje të reja, ndërsa projektet për ndërtimin e godinave të akomodimit janë në zhvillim”, u shpreh ministri.
Ai shtoi se Ministria e Mbrojtjes është e përkushtuar për të krijuar mundësi të reja për të rinjtë që zgjedhin të ndjekin karrierën ushtarake.
“Në vijim do t’u japim mundësinë të gjithë atyre që ndjekin karrierën ushtarake që të vazhdojnë rrugëtimin e tyre profesional në Forcat e Armatosura përmes trajnimeve dhe arsimimit”, deklaroi Vengu.
Gjatë periudhës 2023–2025, në Regjimentin e Këmbësorisë së Veriut janë realizuar mbi 126 milionë lekë investime, që kanë përfshirë përmirësimin e infrastrukturës dhe kushteve të punës për efektivin e Regjimentit.
Aktualisht është në proces ndërtimi objekti i ri me një vlerë investimi prej rreth 157 milionë lekë, ndërsa totali i investimeve të pritshme deri më vitin 2026 parashikohet të arrijë vlerën e mbi 284 milionë lekë.
Këto investime dhe përgatitje përbëjnë një hap konkret drejt modernizimit dhe forcimit të kapaciteteve të Regjimentit të Këmbësorisë së Veriut, në përputhje me objektivat strategjikë të Forcave të Armatosura të Republikës së Shqipërisë.
