Miliarderi Elon Musk, ka sugjeruar se tensionet midis Kinës dhe Tajvanit mund të zgjidheshin nëse Pekini fiton një pjesë të kontrollit të Tajvanit. Ky sugjerim i Musk vjen disa ditë pasi prezantoi idenë për t’i dhënë fund luftës midis Rusisë dhe Ukrainës
“Rekomandimi im do të ishte që të krijohej një zonë e veçantë administrative për Tajvanin, diçka shumë e pëlqyeshme, por që ndoshta nuk do t’i bëjë të gjithë të lumtur, “tha Musk, për Financial Times në një intervistë të botuar të premten.
Musk i bëri këto komente, ndërkohë që po jepte përgjigje për një pyetje të bërë në lidhje me Kinën, ku kompania e tij e makinave elektrike Tesla operon një fabrikë të madhe në Shangai.
Pekini, i cili thotë se Tajvani i sunduar në mënyrë demokratike është një nga provincat e tij, është zotuar prej kohësh ta vendosë atë nën kontrollin e tij dhe nuk e ka përjashtuar përdorimin e forcës për ta bërë këtë.
Qeveria e Tajvanit kundërshton me forcë pretendimet e Kinës për sovranitet dhe thotë se vetëm 23 milionë banorët e ishullit mund të vendosin për të ardhmen e tij.
“Dhe është e mundur, dhe unë mendoj se ndoshta, në fakt, ata mund të kenë një marrëveshje që është më e përshtatshme se ajo e Hong Kongut,” citohet të ketë thënë Musk.
Fabrika e Shangait përbënte rreth gjysmën e dërgesave globale të Teslës vitin e kaluar. Musk tha gjithashtu se Kina ka kërkuar garanci se ai nuk do të ofronte shërbimin e internetit Starlink të kompanisë së tij të raketave SpaceX atje.
Musk tha se ai mendoi se konflikti mbi Tajvanin ishte i pashmangshëm dhe paralajmëroi për ndikimin e tij të mundshëm jo vetëm në Tesla, por edhe në prodhuesin e iPhone, Apple Inc dhe ekonominë më të gjerë.
Më parë këtë javë, Musk propozoi që Ukraina t’i dorëzojë përgjithmonë Krimenë Rusisë, që të mbahen referendume të reja nën kujdesin e OKB-së për të përcaktuar fatin e territorit të kontrolluar nga Rusia dhe që Ukraina të pajtohet me neutralitetin./Opinion.al
