Në një aktivitet të zhvilluar këtë të premte në shkollën dhe kopshtin “Lasgush Poradeci” në Kombinat, të rindërtuar pas tërmetit tragjik të 26 nëntorit kryeministri Edi Rama edhe njëherë vuri theksin te rëndësia e teknologjisë, ku tha se synohet që mësimi i saj të futet që në klasë të parë.
“Nxënësve që janë të pranishëm dua t’u them se duhet të shkojmë shumë përtej infrastrukturës së re dhe prandaj do të angazhohemi që nga viti i ardhshëm. Do të bëjmë ndryshim për laboratorët duke filluar nga ky vit, do të bëjmë një ndryshim për mësimin e informatikës. Dhe do të fusim më tutje edhe mësimin e teknologjisë që në klasën e parë, sikur kemi futur anglishten.. Do investojmë që të kemi biblioteka. Bibliotekat që kemi sot në shkolla nuk janë biblioteka prej vërteti, janë ca rafte. Bibliotekat duhet ët jenë të pasura dhe të organizuara në funksion të gjithë atyre që duan të ruajnë kontaktin me librin”, tha Rama.
Gjatë fjalës së tij, kryeministri Rama iu përgjigj edhe akuzave të PD-së se qeveria ka vjedhur para nga fondet e dhëna nga donatorët për rindërtimin.
“I gjithë ky proces rindërtimi është një proces i jashtëzakonshëm për të gjithë sinergjinë e krijuar. Ky proces do të ishte i pamundur nëse nuk do na ishin bashkuar kaq shumë miq e partnerë. Sa i përket zbatimit të projekteve, të gjitha projekte e financuara nga të gjithë partnerët nga BE deri te Qeveria e Katarit, janë financime të administruara nga ata vetë. Të gjithë atyre që flasin për miliarda që i mori në një thes qeveria e Shqipërisë, dua ti them asnjë qindarkë e partnerëve nuk është administruar nga qeveria e Shqipërisë. Partnerët kanë vënë në dispozicion fondet, kanë paguar projektet, kanë lidhur kontrata dhe qeveria me bashkitë thjeshtë kanë shoqëruar këtë proces”, tha kryeministri.
