Pas 12 dhjetorit, kur Milani të kalojë në duart e pronarëve të rinj nga Kina, pritet një takim kokë më kokë mes trajnerit Vincenzo Montella dhe drejtuesve të rinj. Një takim që ka si synim merkaton e janarit dhe përforcimi që kuqezinjtë do të bëjnë për të mos humbur pozicionin në renditje. Natyrisht që nuk do të ketë vetëm afrime, por edhe largime, pasi aktualisht nën urdhërat e Montellës janë 28 lojtarë, shumë prej të cilëve do të “hapin krahin” gjatë janarit. Për disa shitja do të jetë e menjëhershme, disa do të jepen në formë huazimi, për t’u rivlerësuar verën e ardhshme.
I pari që pritet të largohet është sulmuesi japonez Honda, që nuk po gjen hapësira dhe që duket se nuk bën pjesë në planet e trajnerit kuqezi. Japonezi ka thënë se “kam patur oferta për t’u larguar, por nuk ishin të përshtatshme për mua. Nuk dua të largohem, por do të shohim”. Një tjetër enigmë këtë sezon është Rodrigo Ely, që konsiderohej i paprekshëm, por që Montella e ka ngujuar në stol. Më pas është Luiz Adriano, që duket se do të largohet, pasi aktivizohet pak dhe nuk po jep atë që pritej. Enigmë edhe e ardhmja e Carlos Bacca, që momentalisht nuk po jep atë që pritej edhe pse e nisi mirë sezonin. Të gjithë këta emra do të kalojnë në sitë, por pas 12 dhjetorit…
