Presidenti Ilir Meta ka kërkuar sërish që kriza politike të zgjidhet duke zbatuar Kushtetutën. Gjatë një takimi me Drejtorin e Përgjithshëm për Ballkanin Perëndimor në Ministrinë e Punëve të Jashtme të Britanisë Madhe, ambasadorin Andreë Page, presidenti diskutoi lidhur me krizën në vend, si dhe mbi zhvillimet në rajon.
Meta theksoi domosdoshmërinë e rikthimit urgjent të vendit në shinat e demokracisë dhe shtetit ligjor, duke i shërbyer njëkohësisht objektivit strategjik të çeljes së negociatave të anëtarësimit me Bashkimin Europian gjatë Këshillit të tetorit.
“Presidenti Meta vlerësoi marrëdhëniet e shkëlqyera dypalëshe ndërmjet Shqipërisë dhe Mbretërisë së Bashkuar, me bindjen se ato do të vijojnë të jenë edhe më dinamike në të ardhmen, veçanërisht në bashkëpunimin ekonomik e tregtar. Kreu i Shtetit mirëpriti angazhimin e shtuar të Britanisë së Madhe përmes burimeve njerëzore dhe financiare në ndihmë të 6 vendeve të Ballkanit Perëndimor në luftën kundër krimit të organizuar dhe korrupsionit, dhe për nxitjen e zhvillimit ekonomik, sikurse u premtua gjatë Samitit të Londrës”, theksohet në njoftimin e Presidencës./ Opinion.al
