Presidenti Meta ka uruar besimtarët myslimanë për natën e shenjtë të Kadrit nga Myftinia e Shkodrës.
Ai tha se kishte zgjedhur Shkodrën për të dhënë urimin e tij pasi e cilësoi atë si simboltë besimit në zot dhe vlerave atëdhetare. Së bashku me Myftiun e Shkodrës ata kishin vizituar xhaminë e Parrucës. Teksa foli për këtë të fundit Meta rikujtoi edhe njëherë referenca të vitit 1967, kur u shembën objektet e kultit në Shqipëri. Gjatë fjalës së tij Presidenti përdori disa fjalë të cilat kanë qenë në reagimet e tij për çështjen e teatrit.
“Dua të falënderoj myftiun e Shkodrës për këtë mikpritje por edhe për gjithë bashkëpunimin e shkëlqyer që kemi pasur në vijimësi. Zgjodha vetë që në këtë natë të bekuar të Kadrit të isha pikërisht këtu në Shkodër pasi Shkodra është në zemrën e çdo shqiptari të ndershëm dhe patriot, simboli i besimit, besimit në Zot por i besimit në vlerat më të mira atdhetare dhe të familjes. Është simboli i harmonisë dhe i bashkëjetesës por edhe i qëndresës dhe durimit. Vizituam xhaminë e Parrucës e cila është ribërë dy herë, u shkatërrua në ‘67 në periudhën më të errët të komunizmit po u rindërtua në periudhën e demokracisë. Dua të uroj Gëzuar këtë natë të bekuar të paqes së madhe dhe sot na kujton dhe më me forcë, mësimet e mençura të Profetit Muhamed se besimi më i mirë është tek durimi dhe zemërgjerësia”, tha Meta.
I pyetur rreth çështjes së Teatrit, Meta tha se edhe ajo është çështje e shenjtë pasi është kombëtare por nuk zgjodhi të komentonte më gjatë. /Opinion.al
