TIRANË– Kreu i Kuvendit, Ilir Meta ka reaguar lidhur me kërkesën e PD-së për dorëheqje pas publikimit të një lajmi se Meta ishte përfshirë në një skemë korruptive me CEZ-in në kohën kur ishte zv.Kryeministër. “Do të vazhdoj ta respektoj kërkesën e tyre për dorëheqjen time dhe do të kenë kohë edhe dy vjet për ta kërkuar këtë dorëheqje”, tha Meta, duke lënë të kuptohet se as nuk i shkon mendja për t’u dorëhequr.
Sipas Metës, kontratën e ka firmosur ish-administratori i CEZ, Sait Dollapi.
“Lidhur me faktin që kjo kompani është e kontraktuar nga qeveria aktuale, pretendimet e bazuara mbi raportin e saj janë të besueshme, por kisha një pyetje: Sait Dollapi është anëtar i Asamblesë së Partisë Socialiste apo i Këshillit Kombëtar të Partisë Demokratike?!”, shprehet Meta.
Duke vazhduar më tej, Meta thotë: “Kam para një “Engagement Letter” dhe “Fee Agreement” midis “Clifford Chance”, që është kontraktuar nga CEZ-i e firmosur më 1 korrik 2013. Kohë kur Kryeministër ishte i nderuari, Sali Berisha, pra është firmosur në Mynih më 1 korrik nga Tim Schreiber për “Clifford Chance” dhe nga z. Sait Dollapi për CEZ-in”.
Po në përgjigje të akuzave të demokratëve, Meta thotë se “mund të pyesin ish-Ministrin e Financave, sepse kjo kompani ka qenë kliente e kësaj qeverie edhe për shumë kontrata të tjera me Ministrinë e Financave dhe kjo është një çështje e tyre”.
Më pas ai u bëri thirrje demokrateve që nëse vertet i besojne kompanisë “Clifford Chance” le ta çojë çështjen në prokurori.
