Presidenti Ilir Meta ka publikuar në Facebook, videon e parë kundër Ardian Dvoranit, të cilin e akuzon se është përdorur për të kapur Gjykatën Kushtetuese.
“Ju ftoj të ndiqni me vëmendje dhe durim, spotin e parë në mbrojtje të Kushtetutës dhe integritetit të Gjykatës Kushtetuese”, shkruan Presidenti Meta.
https://www.facebook.com/ilirmetazyrtar/videos/435482380462138/
Më herët gjatë ditës Presidenti u paraqit në Prokurorinë e Tiranës, ndërsa në një deklratë për gazetarët tha: “Jam këtu në përgjigje të ftesës nga prokuroria, pas kallëzimit penal që kam bërë për Ardian Dvoranin, për dy vepra të qarta penale të përmbushura me dashje prej tij: shpërdorim detyre dhe përvetësim kompetence dhe të titullit shtetëror. Kemi dhënë sqarime të mëtejshme dhe plotësuese në vijim të provave dhe dokumentave që kishim dorëzuar. Rasti është tmerrësisht flagrant, shpresoj që prokuroria të mos jetë nën presione politike dhe të bëjë punën e saj me profesionalizëm. Kjo është provë e madhe për të ardhmen e Reformës në Drejtësi. Kushtetuta e thotë shumë qartë se “Kushtetuta është ligji më i lartë i Republikës” dhe se “dispozitat kushtetuese zbatohen në mënyrë të drejtpërdrejtë, përveç rasteve kur Kushtetuta parashikon ndryshe”. Unë kam zbatuar në mënyrë të drejtpërdrejtë dispozitat kushtetuese”.
“Të gjitha provat e depozituara deri tani janë të mjaftueshme që prokuroria të veprojë ndaj Ardian Dvoranit. Kjo është çështje që askush nuk mund t’i shmanget. Ne jemi të qetë dhe do të bashkëpunojmë ngushtë me prokurorinë sepse është rast flagrant”, shtoi Presidenti.
Kreu i shtetit reagoi edhe për amendamentet ligjore të mazhorancës, përmes të cilave ajo synon të krijoje një mekanizëm zhbllokues për rastet kur Presidenti refuzon të zhvillojë ceremoninë e betimit për njerëzit e drejtësisë.
“Presidenti i Republikës është me mision dhe nuk provokohet nga cic-mice të tilla, nga kushdo që i orkestron ato. Presidenti ka qenë, është dhe do të jetë garant i Kushtetutës dhe i fton të gjithë të merren me përballimin e pasojave të tërmetit në mënyrë më të përgjegjshme. Kush gjen kohë në këto momente për të provokuar Presidentin dhe popullin e Shqipërisë për t’u marrë me çështje të tjera, ta ketë të qartë se Presidenti e di mirë detyrën e tij dhe është i ndërgjegjshëm për misionin e tij”./ Opinion.al
