Ministri i Drejtësisë, Petrit Vasili ka nisur një bashkëbisedim me studentët në këndin e Ekselencës në emisionin e mëngjesit “Vila 24” në News 24 pak minuta pasi kryeministri Edi Rama dhe kryedemokrati Lulzim Basha janë ulur në një tryezë dialogu pas thirrjes së Presidentit të vendit, Bujar Nishani.
Ndërsa u shpreh se palët do arrijnë të gjejnë zgjidhje për krizën, Vasili iu përgjigj edhe pyetjes për zgjedhjen e Metës president dhe nëse kjo ishte një lëvizje që ky i fundit t’i shpëtonte vettingut.
“Përgjigjja është e thjeshtë. Zgjedhja e presidentit ishte një nga pikat e paketës që ta propozonte opozita. Ne mund ta kishim zgjidhur këtë çështje që në raundin e parë. Në momentin kur u vu në lojë stabiliteti i vendit, dhe vendit i duheshin ekuilibra u vendos kështu. Nuk gjej dot asnjë lidhje mes zgjedhjes së Presidentit dhe vettingut. Për vettingun ka shumë propagandë dhe flitet pak për përmbajtjen e tij. Shumica e njerëzve dinë vetëm emrin. Është proces verifikimi. Një gjyqtar ka deklaruar pasurinë dhe duhet ti nënshtrohet një verifikimi. Duhet ta dini që reforma në drejtësi nuk është sukses i njërit apo i tjetrit, ishte vullnet i 140 deputetëve në Kuvend”,- tha ai.
