Kryetari i Partisë së Lirisë, Ilir Meta ka mbledhur ditën e sotme kryesinë e partisë për herë të parë pas humbjes së thellë në zgjedhjet vendore të 14 majit.
Meta tha se koalicioni ‘Bashkë Fitojmë’ do të vijojë me kontestimet e rezultateve në bashki të ndryshme ku sipas tij është ndryshuar vullneti i qytetarëve.
Sa i takon rezultatit në zgjedhje, Meta u përqendrua më së shumti tek mandatet e fituara nga opozita në këshillat bashkiakë, gjë që sipas tij do rikthejë transparencën në bashkitë e vendit.
“Është bërë ndaj qytetarëve gjatë zgjedhjeve. Dhjetëra miliona euro u ndanë si bonuse. Kuti e fundit e Rrogozhinës bëri të përmbysej vullneti i qytetarëve nga ata të cilët ishin të marrë peng në burgje. Është detyra jonë të vazhdojmë kontestimin ligjor të çdo rezultati që ka shkelje. Do përgatitemi të rikthejmë zërin e opozitës në pushtetin vendor, një zë që nuk ekzistonte për 4 vite. Përfaqësues të opozitës dhe të PL-së tashmë janë këshilltarë në të gjitha bashkitë e vendit, të përgatitemi që llogaridhënia dhe transparenca të nisë që në ditën e parë. Të nisë transparenca në lidhje me buxhetin e shkuar të bashkive.”, deklaroi Meta.
Sipas tij, humbja e thellë e 14 majit, ka qenë një proces i mirëokestruar që ka nisur që nga djegia e mandateve të opozitës në 2019-ën dhe bojkoti i zgjedhjeve vendore në të njëjtin vit.
“Ka qenë një proces i mirëorkestruar që nga djegia e mandateve dhe dhënia e parlamentit për 2 vite me radhë në dispozicion të rilindjes për të qepur një 14 maj. Falë pushtetit vendor në 4 vite, bojkoti i reformës në drejtësi që nuk funksionin ndaj Rilindjes që shkel ligjin. Vepron edhe atëherë kur duket si e paanshme me telekomandë të rilindjes për larje hesapesh brenda tyre”- u shpreh Meta.
