Presidenca iu ka kthyer përgjigje 72 pyetjeve që trupa gjykuese e Gjykatës Kushtetuese i ka bërë palës së presidentit Meta gjatë seancës gjyqësore, ku u shqyrtua kërkesa e Kuvendit për shkarkimin e Presidentit.
Pyetjet u publikuan në faqen zyrtare të presidencës, ku thuhet:
“Pas shqyrtimit të përmbajtjes së të gjithë pyetjeve, rezultoi se disa prej tyre në dukje përmbajnë elementë të paragjykimit të çështjes dhe mund të jenë të ndikuara nga perceptimi propagandistik”.
Ndërkohë pyetja e parë lidhet me qëndrimet dhe deklaratat e Presidentit në kanale televizive.
Pyetje: Gjykata ju ka përcjellë, krahas vendimit të Kuvendit edhe provat përkatëse: deklarata e qëndrime tuajat në kanale televizive, në konferenca shtypi, takime, postime në Facebook, faqen zyrtare në website, etj. A keni paraprakisht ndonjë rezervë për vërtetësinë e tyre?
Përgjigje: Provat e marra, përmes një procesi të parregullt ligjor, në kundërshtim me Kushtetutën, ligjin dhe rregullat e përcaktuara për këtë qëllim, ashtu siç dhe kemi parashtruar, janë të papërdorshme dhe të pavlefshme. Të gjitha provat që Kuvendi pretendon se ia ka depozituar Gjykatës Kushtetuese, janë marrë përmes një procesi antikushtetues, në kundërshtim me parimet dhe dispozitat e ligjit nr. 8891/2002, dhe Rregullores së Kuvendit. Rrjedhimisht, dhe produkti i prodhuar duke u bazuar mbi to, është i pavlefshëm dhe i papërdorshëm. Siç është kërkuar në parashtrimet tona, Gjykata kushtetuese ka për detyrë të shfuqizojë të gjitha vendimet e Kuvendit të Shqipërisë.
Meta është pyetur edhe se si e realizoi Presidenti rolin e përcaktuar në Kushtetutë si përfaqësues i unitetit të popullit.
Pyetje: Si e realizon Presidenti rolin e përcaktuar në Kushtetutë (neni 86) si përfaqësues i unitetit të popullit?
Përgjigje: Presidenti e realizon këtë rol, në mbështetje të Kushtetutës, të ligjeve të vendit, të jurisprudencës së Gjykatës Kushtetuese, në përputhje me rolin dhe pozitën që Kushtetuta i ka dhënë. Në funksion të këtij roli, Presidenti ka shprehur shqetësimet e tij, ndaj gjithë institucioneve shtetërore dhe subjekteve politike, sa herë që ai ka konstatuar që ata kanë dalë jashtë kornizës 18 së Kushtetutës dhe ligjit, me veprimtarinë e tyre, dhe veçanërisht në periudhën e zgjedhjeve ku situata politike shoqërore në vend u rëndua së tepërmi. Presidenti, inkurajoi dhe nxiti organet ligjzbatuese që të vepronin me përparësi, ndaj ngjarjeve tragjike si ajo e Elbasanit, ku për fat të keq pati dhe humbje jete, të Kavajës, Fierit, me qëllimin e vetëm parandalimin e përshkallëzimit të tensionimit të situatës që do të komprometonte rëndë procesin zgjedhor dhe paqen sociale. Është fakt se në të gjitha rastet e këtyre konflikteve, shkaktarët i përkisnin mazhorancës. Ashtu siç është fakt se këto ngjarje erdhën si rezultat i mos hetimit në kohë të denoncimeve të bëra për elementë të përfshirë në krime zgjedhore, si rezultat i mosveprimit në kohë nga ana e policisë dhe institucioneve ligjzbatuese për të ndaluar elementët kriminalë, dhe mbështetjes politike që këta elementë gëzonin, e që është e provuar publikisht.
Po ashtu në përgjigjet e pyetjeve flitet edhe për dyshime të forta për manipulim të një prove shkresore.
“Mes këtyre dy versioneve rezultojnë qartë disa ndërhyrje që ngrenë dyshime të forta për manipulim të këtij dokumenti, me qëllim rrëzimin e pretendimeve të faktuara të Presidentit të Republikës për shkeljet procedurale që ka kryer Kuvendi i Shqipërisë gjatë gjithë procesit të ndërmarrë për shkarkimin e Presidentit të Republikës. Jemi thellësisht të tronditur se si mundet organi i Kuvendit të Shqipërisë, apo administrata e tij, që në përmbushje të një qëllimi të pastër politik, për të mbrojtur para Gjykatës shkeljet që ka kryer në mënyrë flagrante, arrin të manipulojë dhe përmbajtjen e akteve të veta”, thuhet në përgjigje.
Kujtojmë se për këtë rast Presidenti Meta ka paralajmëruar se do të ngrejë padi në Prokurori.
Përgjigjet e pyetjeve /Opinion.al
