Presidenti i Republikës, Ilir Meta ka bërë sërish apel ndaj largimit të popullsisë së re nga Shqipëria.
“Ndalimi i shpopullimit të Shqipërisë, sfida më e madhe që kërkon reflektim urgjent!” shkruan Meta në Facebook, duke bashkëngjitur një artikull të gazetës monitor që flet për një anketë të fonacionit gjerman Friedrich Ebert për Edukimin e të rinjve në Europën Juglindore.
Sipas saj, 285 mijë shqiptarë planifikojnë të ikin nga vendi në vitet në vijim, shumica të rinj. 26 për qind kanë pohuar se dëshirojnë të emigrojnë në Gjermani, 18 për qind në Britani , 16% në Itali dhe pjesa tjetër në vende të tjera.
Një tjetër përfundim i anketës është se në raport me totalin e të rinjve që duan të emigrojnë, Shqipëria mban rekord me 40% të të rinjve që preferojnë të largohen nga vendi.
“Faktorët ekonomikë dhe perceptimi negativ i situatës në vendin e lindjes janë faktorët më të fortë motivues për emigracionin e të rinjve
Studimi u rekomandon vendeve që të përmirësojnë politikat e trajtimit te të rinjve sidomos në drejtim të punësimit dhe edukimit të cilat çojnë në frenimin e emigrimit. Zhvillimi i politikave të tilla duhet të përvetësojë një qasje integrale, të shumanshme, duke synuar pasigurinë ekonomike, mundësitë e dobëta të punësimit dhe perspektivat e karrierës, si faktorët kryesor motivues të emigracionit” shkruan Monitor. /Opinion.al
