TIRANË- Zv.ministrja e Arsimit, Nora Malaj sqaroi rregullat e testimit për mësuesit e rretheve ndërsa nxori në pah edhe të metat e mësuesve të Tiranës, që u testuan më herët.
Janë rreth 16 500 mësues që testohen nesër (e shtunë) në rrethe. Provimi do të nisë në orën 11:00 deri në orën 13:00. Në testim nuk do të futen mësuesit që kanë arritur shkallën e parë të kualifikimit dhe kanë mbi 20 vite eksperiencë pune.
Malaj qetësoi mësuesit duke thënë se “qëllimi i këtij monitorimi nuk ka lidhje me lëvizjen e mësuesve apo situata të tjera punësimi, por ka të bëjë me hartën që Ministria e Arsimit dhe Sportit po ndërton për nevojat e formimit profesional të mësuesve”.
Duke folur për rezultatet e testimit në Tiranë, ajo tha se dolën disa problematika që lidhen me menaxhimin e orës së mësimit, komunikimin, etikën, legjislacionin, etj.
“Kryefjala e këtij procesi është ta shikojmë në thellësi problemin, duke mos u marrë vetëm me pasojat, por për të analizuar shkaqet që të japim më pas zgjidhjet për vendosjen e standardeve”, deklaroi Malaj.
Malaj komentoi edhe raportin e fundit të Bankës Botërore, sipas të cilit 60 për qind e nxënësve në vitin 2012 në lëndën e Matematikës ishin analfabetë. “Analfabetizmi funksional është një proces ku një nxënës mund të shkojë në shkollë, mund të qëndrojë gjatë gjithë orës së mësimit dhe në fund dija e tij është minimaliste dhe jo ajo që duhet. Ndaj, MAS po zhvillon testimin e mësuesve, rezultatet e të cilit janë më se të domosdoshme në orientimin e duhur të politikave të ministrisë për hartimin e një skeme të re kualifikimi dhe trajnimi profesional të mësuesve shqiptarë”, u shpreh Malaj.
*fotoja eshte ilustruese
