Mbi 30 persona janë shoqëruar nga policia e Durrësit në përpjekje për të zbardhur vrasjen e dyfishtë të ndodhur mbrëmjen e së dielës në qendër të këtij qyteti. Mes tyre ka persona të dyshuar, por edhe të tjerë që kanë dijeni për ngjarjen. Burime nga grupi hetimor thanë se nga dëshmitë e marra në vendin e ngjarjes është zbardhur dinamika e vrasjes. Rreth orës 20:45 minuta, autorët kanë pritur makinën e viktimave në rrethrrotullimin pranë “Torres”, një prej zonave më të populluara të Durrësit.
33-vjecari nga Durrësi Ervin Kodra dhe dhe 25 vjecari nga Vlora Endri Çaushaj po udhëtonin me një BMW X5 nga Ura e Dailanit në drejtim të Currilave. Kur kanë ulur shpejtësinë për shkak të rrethrrotullimit, një person është parë t’I afrohet makinës dhe të derdhë breshri plumbash drejt saj. Sipas dëshmive ai ka qenë I vetëm ndërsa më pas ka hipur në një makinë e cila drejtohej nga një tjetër person. Ekspertët thanë se në krim është përdorur vetëm një armë ndërsa të paktën 30 gëzhoja u gjetën në vendngjarje.
Burime nga grupi i hetuesve thanë se atentati ka qenë i mirëorganizuar. Sipas këtyre burimeve atentatorët kanë patur dijeni për lëvizjen e viktimave të tyre. Hetimet janë përqëndruarnë të paktën 2 pista, ajo e hakmarrjes dhe ajo e larjes së së hesapeve. Në qendër të atentatit dyshohet të ketë qenë Ervin Kodra. Në policinë e Durrësit thanë se ai është me precendetë penalë pasi dyshohet se në vitin 2008 ka qenë pjesë e grupit që kreu një vrasje. Ai ka qenë i dyshuar edhe për disa vepra të tjera penale ndërsa për të riun nga Vlora ka pak detaje. /tvklan/
