Irani dhe Shtetet e Bashkuara kanë shkëmbyer të burgosur, në një kohë kur tensionet ndërmjet tyre janë të mëdha. Bëhet me dije se Irani do të lirojë studentin Xiyue Wang, ndërsa SHBA-ja shkencëtarin iranian, Massoud Soleimani.
Ministri i Jashtëm iranian, Mohammad Javad Zarif, njofti në Twitter se shkëmbimi i të burgosurve do të ndodhë së shpejti.
“I lumtur që profesori Massoud Soleimani dhe Xiyue Wang do të ribashkohen së shpejti me familjet e tyre. Faleminderit të gjithë të përfshirëve, veçanërisht Qeverisë zvicerane”, shkroi Zarif.
Ambasada zvicerane në Teheran përkujdeset për interesat amerikane në Iran, pasi ambasada amerikane në këtë vend është e mbyllur që prej vitit 1979.
Kujtojmë se Xiyue Wang, shtetas amerikan dhe student i diplomuar në Universitetin Princeton, ishte duke kryer kërkime për tezën e diplomës së tij në Iran më 2016, kur u arrestua dhe u akuzua nga Irani për “spiunim”, një pretendim që familja e tij, por edhe universiteti Princeton e mohojnë. Ai më pas u dënua për spiunazh me 10 vjet burgim.
Ndërkaq, Massoud Soleimani, ekspert i qelizave, ishte arrestuar në Çikago në tetorin e vitit 2018, nën akuza se ka tentuar të eksportojë paligjshëm materiale biologjike në Iran, që është në kundërshtim me sanksionet që SHBA-ja ka vendosur kundër Iranit, për shkak të programit të tij bërthamor.
Tensionet ndërmjet SHBA-së dhe Iranit janë rritur që prej kohës kur presidenti Trump u tërhoq nga marrëveshja bërthamore e Iranit me fuqitë botërore dhe rivendosi sanksionet e ashpra ekonomike ndaj Republikës Islamike./Opinion.al
