Nuk ka kthim pas për zbatimin e protokollit Itali – Shqipëri për migracionin. Është Kryeministrja Giorgia Meloni që këmbëngul të çojë përpara një kërkesë të shumicës së qytetarëve.
“Qeveria është e vendosur të çojë përpara protokollin Itali-Shqipëri. Jemi të vendosur të gjejmë zgjidhje për çdo pengesë që shfaqet. Dhe do të ecim përpara “jo vetëm sepse besojmë në protokoll, por edhe sepse pretendojmë të drejtën e politikës për të qeverisur dhe detyrën e politikës për të marrë përgjegjësi”, tha Giorgia Meloni.
Meloni shtoi se ndalimin e fluksit migrator e kërkon shumica e qytetarëve.
“Ata kërkojnë që të ndalojmë emigracionin e paligjshëm sepse ai prodhon pasiguri, mungesë integrimi, pamundësi për të garantuar sundimin e ligjit dhe gjithashtu sepse emigracioni i paligjshëm masiv është armiku i parë i emigracionit të ligjshëm”, tha Giorgia Meloni.
Meloni foli menjëherë pas Komisionerit Europian për Migracionin Magnus Brunner, i cili në një intervistë për agjencinë ANSA e mbështeti protokollin Itali-Shqipëri për transferimin e emigrantëve të paligjshëm.
“Italia është një partner shumë i rëndësishëm për ne në çështjen e migracionit dhe riatdhesimeve: Mendoj se Italia po përpiqet të gjejë mënyra të reja për të siguruar që riatdhesimet të ndodhin me të vërtetë dhe është shumë pozitive të ketë qasje të reja”.
Kështu Brunner, gjatë një interviste për ANSA, duke iu përgjigjur një pyetjeje mbi protokollin Itali-Shqipëri.
“Italia është një partner shumë i rëndësishëm për ne në çështjen e emigrimit. Unë mendoj se Italia po përpiqet të gjejë mënyra të reja për të siguruar që të ulet fluksi i emigratëve të paligjshëm dhe është shumë pozitive që kemi qasje të reja”, tha Magnus Brunner.
Të martën Brunner do të udhëtojë drejt Italisë. Ai do të takohet me Kryeministren Giorgia Meloni, zëvendëskryeministrin dhe ministrin e Punëve të Jashtme Antonio Tajani, ministrin e Brendshëm, Matteo Piantedosi.
Ata do të shkëmbejnë mendime mbi Strategjinë e ardhshme të Sigurisë së Brendshme, qasjen e re të përbashkët për kthimet e emigrantëve dhe bashkëpunimin me vendet partnere për menaxhimin e migracionit dhe azili./ Klan News
