Të jesh pjesëtar i familjes mbretërore britanike nuk është aq e thjeshtë. Përkundrazi, nënkupton të jesh gjithë kohën i/e vëzhguar mediatikisht dhe të respektosh kodet protokollare. Mbi të gjitha, duhet të përballesh me humorin e mbretëreshës Elizabeth në çdo kohë. Dhe këtë e di më së miri, dukesha e Sussex-it Meghan Markle.
Akoma pa kaluar një javë nga dasma e famshme mbretërore e 19-majit, ajo u detyrua të merrte menjëherë leksione rreth etikës dhe historisë së familjes mbretërore. Mbretëresha e kishte me ngut të ‘’fuste’’ Meghan në rrugë të drejtë. Megjithatë, nuk mund të themi të njëjtën gjë për kërkesat e nuses së re të shtëpisë ditën e dasmës.
The Sun shkruan se Meghan ka dashur që në ditën e dasmës të mbante një kurorë me gurë smeraldi. Mesa duket mbretëresha ka qenë kundër kësaj gjëje. Ajo ka debatuar me Harry-n dhe i ka thënë këtij të fundit se Meghan nuk mund të ketë çdo gjë që do. “Meghan e kishte shumë përzemër atë kurorë me smeraldë. Harry bëri namin kur i thanë që nuk mund ta përdorte. Për këtë ai debatoi me mbretëreshën”, -është shprehur një burim për The Sun.
Po ashtu, mbretëresha nuk ishte dakord që Meghan të mbante një vello, pasi ishte martesa e saj e dytë. Si përfundim, Meghan mbajti një kurorë platini me diamantë të zgjedhur nga mbretëresha, por ia arriti të shfaqej në kishë krah princit Charles, me vellon e dizenjuar nga Givenchy.
