Një ditë pas miratimit të ligjit të vetingut, ose ndryshe filtri i pastërtisë së figurës për gjyqtarët dhe prokurorët kanë nisur edhe alibitë në media.
Gazeta online Tema shkruan se “tre kokat e para që do të priten do të jenë pikërisht drejtuesit e institucioneve të drejtësisë në vend, si Kryeprokurori Llalla, Kryetari i Gj.Lartë, Xhezair Zaganjori dhe kryetari i Gj.Kushtetuese, Bashkim Dedja.
Gazeta shkruan ndër të tjera se ky filtrim do të nisë menjëherë pas ngritjes së Komisionit të Pavarur dhe Kolegjit të Apelimit, në bazë të ligjit të miratuar dje në Kuvend për vettingun. Për të marrë fuqi të plotë ligjore pritet që ligji në fjalë në dekretohet edhe nga Presidenti i Republikës, Bujar Nishani.
“Ka jo pak spekulime se Nishani, duke pasur parasysh edhe natyrën politike të drejtimit të presidencës nga ana e tij, të mbajë anën e PD-së, duke mos e dekretuar ligjin për vettingun duke e rikthyer në Parlament”, shkruan “Tema” që njihet për mbështetjen e saj të hapur ndaj Edi Ramës.
“Nisja e procesit të vettingut me Prokurorin e Përgjithshëm, Kryetarin e Gjykatës Kushtetuese dhe asaj të Lartë, nuk është diçka e rastësishme. Janë pikërisht këta tre persona, të cilët në një farë mënyre mbajnë ndër duar të gjithë sistemin drejtues, hetues dhe gjykues të çështjeve. Praktikisht edhe fytyra e sistemit aktual të drejtësisë, që është tërësisht i rrënuar dhe nën darën e politikës, iu atribohet jo vetëm paaradhësve në këto poste drejtuese, por edhe atye aktual”, vijon Tema.
