Nga Jorida Tabaku
Në indeksin dhe studimin e The Economist Intelligence Unit, një studim i stafit të The Economist që përfshin periudhën nga Shtatori 2016 deri në Mars 2017 lexojmë një analizë të detajuar mbi investimet infrastrukturore në vend si dhe një analizë të shkurtër mbi formatin e Koncesioneve aq shumë të aplikuar nga qeveria e Rilindjes.
Sipas vlerësimit të The Economist, vendi ynë renditet ndër të fundit për investimet në infrastrukturë përmes koncesioneve, sepse sigurisht ato përdoren për shërbime. Jo vetëm kaq por Shqipëria renditet ndër vendet që nuk ka një transparencë të plotë sa i takon regjistrit të Koncesioneve, sikundër edhe menaxhimi i tyre nga ana e qeverisë është tërësisht amatoresk duke qenë larg standardeve më të mira të vendeve të tjera sipas po të njëjtit raport.
Për rrjedhojë ne jemi të fundit në listën e vendeve të shqyrtuara prej The Economist.
Sipas studimit nga ana e stafit të gazetës prestigjioze, vendi është i dobët në fushën e identifikimit të projekteve dhe ofrimit të tyre shoqëruar me studime serioze. Një qeveri e paaftë për të zhvilluar në shërbim të vendit qasjen ndaj investimeve të huaja megjithëse ka trashëguar një legjislacion që nga viti 2013 dhe përpjekje serioze të vlerësuara në raportin në fjalë. Për fatin e keq në katër vitet e fundit qeveria ka dështuar, sipas raportit, për të zhvilluar akoma më shumë Koncesionet dhe për t’i kthyer ato jo vetëm në burim përfitimi për vendin por edhe për t’i pasur ato më transparente për publikun dhe investitorët që kanë një plan serioz për financimin e Koncesioneve.
Raporti vërteton se si qeveria është përpjekur për të përdorur koncesionet si një mbulesë në shërbim të interesit të saj oligarkik në kurriz të shqiptarëve. Paratë janë përdorur për investime dhe përfitime personale.
Citoj: “mungesa e burimeve financiare dhe njerëzore në ministritë e linjës është një problem, po kështu identifikimi i projekteve më të mira dhe studimet e fizibilitetit janë të domosdoshme, shoqëruar këto me manuale teknike. Gjithashtu, vëren studimi, kontratat manaxheriale dhe monitorimi i performancës së PPP-ve ka qenë ineficent sikundër dhe praktikat e alokimit të riskut janë jo optimale. Nuk ka dispozita të qarta në rregulloret lidhur me kontabilizimin e detyrimeve kontingjente në projektet e PPP. Kategoria më e dobët në indeksimin e vendit është Financimi, duke qenë se tregu kapital është i pazhvilluar dhe se mbështetja më e madhe është në financimet multilaterale.”
