Ky që shihni në foto është automjeti që përdorën autorët në atentatin e të shtunës në Shijak ndaj Orlando Paplekaj, djali i një punonjësi policie në paraburgimin e Durrësit.
Tv Klan ka siguruar ekskluzivisht këtë foto nga pamjet filmike rreth 1 kilometër nga vendi i ngjarjes, ku shihet automjeti tip Golf me të cilin lëviznin autorët pas atentatit.
Burime nga grupi hetimor bëjnë me dije se makina e përdorur nga autorët të cilët dyshohet se ishin 2, rezulton të jetë me targa të vjedhura në Tiranë.
Atentati ndaj Orlando Paplekajt u regjistrua mesditën e së shtunës në aksin Xhafzotaj-Shijak ku fatmirësisht 31-vjeçari i shpëtoi breshërisë së plumbave.
Vetë shënjestra e atentatit përpara hetuesve ka deklaruar se nuk ka mundur t’i identifikojë autorët ndërsa ka treguar se po transportonte bombola oksigjeni kur në drejtim të kamionçinës që lëvizte është qëlluar me breshëri plumbash. Për pasojë i riu humbi kontrollin e mjetit dhe u përplas duke marrë plagë të lehta.
Deri në këtë fazë të hetimit, policia dhe prokuroria nuk ka një pistë konkrete sa i takon motivit të atentatit. Megjithatë po bëhen verifikime për konfliktet e mundshme që të ketë i riu pa përjashtuar dhe detyrën e babait të tij./Tv Klan
