Më shumë se 25,400 viktima është numri i përkohshëm i tërmetit që goditi Turqinë dhe Sirinë të hënën. Por për OKB-në kjo shifër mund të “dyfishohet “. Numri i të vdekurve nga tërmeti në Turqi shkon në 21.848, numri i të lënduarve në 80.104. Kështu deklaroi presidenti turk Rexhep Tajip Erdogan. Numri i njerëzve që vdiqën në Siri do të ishte 3,553, duke e çuar numrin e përgjithshëm të vdekjeve në të dy rajonet në 25,401.
Foshnjat 2 vjeç dhe 2 muajsh u shpëtuan pas 122 dhe 128 orësh, përkatësisht, ndërsa një 17-vjeçar është nxjerrë i gjallë pas 94 orësh nga rrënojat e një ndërtese të shembur në qytetin turk Gaziantep, pranë epiqendrës së tërmetit. Djali tha se ishte i detyruar të pinte urinën e tij për të shuar etjen. “Kam mundur të mbijetoj në këtë mënyrë”, ka thënë ai, siç raporton The Guardian. Kur u shpëtua, 17-vjeçari buzëqeshi ndërsa turma e miqve dhe familjarëve brohoritnin emrin e tij, duke qarë nga gëzimi ndërsa e morën me vete dhe e vendosën në një barelë.
Ndërkohë, sipas UNHCR tërmeti që goditi Sirinë mund të ketë lënë deri në 5.3 milionë sirianë të pastrehë. Organizata po merr ndihma për zonat më të shkatërruara të vendit, duke u fokusuar në sigurimin e strehimit dhe nevojave themelore, si dhe tenda, çarçafë plastikë, batanije termale, dyshekë gjumi dhe veshje dimërore për njerëzit në qendrat kolektive./Opinion.al
