Sipas të dhënave të Eurostat, gjatë 11 muajve të vitit 2024, nga Shqipëria kanë kërkuar mbrojtje ndërkombëtare 6800 aplikues.
Numri i aplikantëve ka rënë me 21 % në krahasim me të njëjtën periudhë të vitit paraardhës, dhe është ndër shifrat më të ulëta në të paktën dekadën e fundit, madje dhe në krahasim me periudhën e pandemisë që kufijtë u mbyllën në mbarë botën.
Rënia e këtyre shifrave tregon se për shqiptarët tashmë azili nuk është më forma e preferuar për të emigruar.
Veç asaj, dhe shumë vende europiane i kanë lehtësuar procedurat për leje pune dhe qëndrimi.
Franca vijon të jetë shteti kryesor që ka numrin më të madhe të aplikime për azil, me rreth 2100 aplikues nga Shqipëria, duke përbërë 31% të aplikimeve për azil në vendet e BE.
Në vendet të dytë ka kaluar Italia me 1735 aplikime, e treta është Gjermania e cila ka përpunuar 1355 kërkesa, ose 20% të totalit të aplikimeve.
Shteti i katërt që ka numër më të lartë azilkërkuesish nga Shqipëria për periudhën Janar – Nëntor 2024, është Greqia me 950 aplikime, dhe më pas renditet Belgjika me 335 aplikime dhe Irlanda 165.
Sipas të dhënave të Eurostat, në Nëntor të 2024, kanë kërkuar azil në vendet e Bashkimit Europian rreth 75 mijë shtetas që nuk janë pjesë e BE-së, shifër kjo që është ulur me 31% krahasuar me Nëntorin e 2023-it.
Gjermania, Spanja, Italia dhe Franca morën 73% të aplikantëve për azil për herë të parë, ndërkohë që sirianët mbeten grupi me numrin më të madh të azilkërkuesve në vendet e Bashkimit Europian.
Klan News
