Është lënë në burg 45-vjeçari që vrau mikun e tij Shpëtim Bajramin në Selanik, Greqi. Ai u vetëdorëzua ditën e djeshme para drejtësisë greke.
Viktima dhe autori kishin njohje me njëri tjetrin, madje ato ishin miq. Shpëtim Bajrami, 51 vjeç, u qëllua me armë nga 45-vjeçari pas një konflikti në një karburant.
Ndërsa sot ai ka dalë në gjykatë për masën e sigurisë. Mediat greke shkruajnë se 45-vjeçari me origjinë shqiptar ka treguar se mes tyre kishte pasur një sherr.
Shkak i përleshjes dyshohet se kanë qenë çështjet financiare që kanë të bëjnë me viktimën dhe autorin.
“Kohët e fundit kam marrë kërcënime serioze për jetën nga viktima. Ka pasur dy incidente të dhunshme ndaj meje nga viktima dhe jashtë karburantit jam sulmuar sërish nga viktima”, tha ai.
Sipas informacioneve, i akuzuari ka hematomë dhe të nxira në kokë nga sulmi që ka marrë nga viktima me send jashtë karburantit dhe për këtë është urdhëruar ekspertiza.
Ngjarja e përgjakshme ka ndodhur në orën 12:35 të së enjtes jashtë një karburanti në rrugën Solonos 51./Opinion.al
