Zyrtarët francezë shpëtuan gati 190 emigrantë që përpiqeshin të kalonin Kanalin Anglez, që shtrihet midis Francës veriore dhe Anglisë jugore, në një seri operacionesh të shtunën, thanë autoritetet. Autoritetet franceze të portit e cilësuan një operacion shpëtimi, pasi jeta e emigrantëve në gomone ishte në rrezik.
Në orët e para të së shtunës, një patrullë e marinës gjeti rreth 60 persona në brigjet franceze, thanë autoritetet bregdetare, në një deklaratë. Ata shpëtuan 50 të tjerë më vonë atë mëngjes, duke i kthyer në territorin francez.
Ndërkohë, xhandarmëria franceze u thirr gjithashtu të shtunën në mëngjes, duke shpëtuar 47 njerëz në brigjet veriore.
Në total, rreth 190 njerëz u shpëtuan në më pak se 24 orë, thuhet në një deklaratë nga autoritetet bregdetare. 29 të tjerë u shpëtuan gjatë ditës dhe u dërguan në Boulogne-sur-Mer, bënë me dije autoritetet.
Një numër në rritje i emigrantëve që kërkojnë të arrijnë në Angli po përpiqen të kalojnë Kanalin Anglez me varka të improvizuara tani që autoritetet kanë shtuar sigurinë.
Kalimi në det është veçanërisht i rrezikshëm sepse Kanali është një nga korsitë më të ngarkuara të transportit në botë.
Ministria e Brendshme e Francës vlerëson se 20,000 njerëz tentuan kalimin midis 1 janarit dhe 13 qershorit të këtij viti: 68% më shumë në të njëjtën periudhë të vitit të kaluar.
Qeveria britanike publikoi shifra të ngjashme muajin e kaluar dhe në fund të gushtit, njoftoi një rekord njëditor prej 1,295 migrantësh të zbuluar duke tentuar të kalonin nga Franca drejt Mbretërisë së Bashkuar.
