Publikimi të premten e javës që lamë pas i raportit shqetësues nga Agjencia UNICEF e Kombeve të Bashkuara mbi rastet e fruthit në rang global ka rikthyer edhe njëherë debatin mbi vaksinimin. 18-vjeçari, Ethan Lindenberger, nga shteti i Ohajos, i cili sfidoi nënën e tij dhe u vaksinua ndaj disa sëmundjeve të rrezikshme, ishte dëshmitari kryesor gjatë një seance dëgjimore të Senatit të martën.
Adoleshenti mori vëmendjen mediatike vitin e kaluar kur postoi në rrjetet sociale mesazhe se sipas prindërve të tij, vaksinat janë “skemë e qeverisë” dhe kërkoi udhëzime se si të mbronte veten. Ai tha se dashuria e nënës së tij, dhembshuria dhe kujdesi janë të dukshme por theksoi se shkolla e tij në Noruak të Ohajos (Norwalk, Ohio) e shihte atë si “kërcënim për shëndetin e të gjithëve” nga rreziku se ai mund të prekej nga ndonjë sëmundje ngjitëse që mund ta merrnin edhe të tjerët.
“U rrita me idenë e nënës times se vaksinat janë të rrezikshme. Ajo fliste hapur për këtë. I shprehte shqetësimet si në internet edhe personalisht dhe mendimet e saj hasën në kritika të ashpra. Gjatë rrjedhës së jetës sime u mboll fara e dyshimit dhe më lindën pikëpyetje si rezultat i reagimeve që merrte nëna. Por koha kalonte dhe kjo nuk po sillte rezultat.”
Në rrëfimin e tij në seancë, Linderberger tha se kërkimet e tij e bindën se vaksinat janë të sigurta, ndaj pa miratimin e të ëmës ai u vaksinua kundër fruthit, hepatitit, gripit, tetanozit e disa sëmundjeve të tjera. Seanca dëgjimore në Senat për vaksinat u thirr pjesërisht për të diskutuar mbi përhapjen e fruthit në Shtetet e Bashkuara.
Me 1 mars, Agjencia UNICEF e Kombeve të Bashkuara raportoi për një rritje tronditëse të rasteve të fruthit. Në botë raportohen mbi 300 mijë raste, me Ukrainën në krye me 30,3 mijë të infektuar. Po kaq shqetësues ishte dhe raporti për Shqipërinë, ku vetëm vitin e fundit shifra e të prekurve krahasuar me vitin 2017 është rritur mbi 120 herë.
Prindërit vazhdimisht stepen kur bëhet fjalë për ti vaksinuar fëmijët e tyre për fruthin, nga frika se kjo vaksinë mund të çojë në autizëm te fëmijët.Një studim i ri ka konfirmuar se nuk ka asnjë lidhje mes autizmit dhe vaksinës MPR, kundër fruthit, shytave dhe rubeolës.Hulumtimi i botuar në revistën shkencore, “Annals of internal Medicine”, të Kolegjit Amerikan të Mjekëve, del në përfundimin se vaksina MMR nuk ishte e lidhur me autizmin dhe rreziku për autizëm në grupin e fëmijëve të vaksinuar ishte i njëjtë me atë të fëmijëve të pavaksinuar.
Pjesë e studimit, ishin 657 461 fëmijë të lindur në Danimarkë nga 1 janari i viti 1999 deri më 31 dhjetor 2010.Puna e kryer bazohej në 6.517 raste autizmi në mesin e fëmijëve të përfshirë në studimin që tregoi se nuk kishte asnjë lidhje midis moshës së fëmijës në kohën e vaksinimit ose kohën që nga vaksinimi dhe zhvillimi i autizmit./B.K Opinion.al
