Kuvendi i Shqipërisë ka miratuar me 117 vota pro arrestimin e ish-zv.kryeministrit Arben Ahmetaj. 3 prej deputetëve abstenuan dhe asnjë nga të pranishmit në seancë nuk votoi kundër. Në këtë formë Kuvendi i heq imunitetin deputetit Arben Ahmetaj dhe i hap rrugë SPAK për arrestimin e tij.
Gjatë seancës së posaçme u lexuan dhe raportet e Komisionit të Mandateve, ku kreu i grupit të PD, Gazment Bardhi ftoi SPAK që t’i shkonte deri në fund hetimit për çështjen e inceneratorëve dhe ftoi Ahmetajn të bashkëpunojë me drejtësinë.
Ndërkohë nga ana e mazhorancës, foli deputeti Arben Pëllumbi, i cili i kërkoi opozitës të ndalë akuzat dhe të lejojë drejtësinë të bëjë punën e saj, teksa shtoi se emri i kryeministrit, ndryshe nga sa pretendon opozita, nuk rezulton në asnjë fjalë të kërkesës së SPAK./Opinion.al
