Një fëmijë ka humbur jetën gjatë një tentative zbarkimi të një grupi emigrantësh në ishullin Lesbos në Greqi. Sipas Cnn.gr, barka e nisur nga një breg i afërt turk është përmbysur kur pranë saj është afruar një njësi e rojes bregdetare greke, e cila njofton se janë shpëtuar 46 persona. Kufoma e fëmijës është gjetur pak minuta më pas. Gjatë natës 5 barka kanë mbërritur në ishujt grek, 2 në Kios dhe 2 në Samos.
Ndërkohë banorët e ishullit Lesbos kanë shfaqur sjellje të dhunshme kundër zbarkimeve, duke qëlluar madje me gurë e sende të forta edhe gazetarët apo përfaqësuesit e UNHCR. Dhjetëra persona kanë penguar zbarkimin e një gomoneje me rreth 50 emigrantë (mes të cilëve edhe fëmijë) në zonën e termit, të cilët kishin patur disa orë qëndrimi në det.
Ky grup personash ka refuzuar edhe punonjësit e Organizatës së Kombeve të Bashkuara që ndodheshin aty për të ndihmuar emigrantët. Një qendër e pritjes së emigrantëve është djegur, ndërsa imazhet e sulmit ndaj gzetarëve në një bankinë në port, janë bërë virale në rrjet. Kujtojmë që Greqia po përballet me një valë të re emigrantësh sirianë, pas hapjes së kufirit nga ana e Turqisë.
Gjatë ditës së sotme, mediat ndërkombëtare kanë publikuar videot kur rojet bregdetare greke përpiqen të përmbysin një varkë me emigrantë e madje, përdorin edhe armë zjarri ndaj tyre. /Opinion.al
