Është mbyllur protesta e sotme e opozitës.
Tubimi nisi që nga ora 17:00 me tensione dhe përplasje mes protestuesve dhe forcave policore.
Ashtu siç ishte paralajmëruar, opozita bllokoi pesë rrugët kryesore në kryeqytet, para Bashkisë së Tiranës, sheshi Willson, Pallati me Shigjeta, Zogu i Zi dhe zona pranë selisë blu, në kryqëzimin e Rrugës së Elbasanit.
Kujtojmë se kanë qenë të shumta përplasjet mes deputetëve të PD-së dhe forcave policore, ku këta të fundit kanë përdorur disa herë ujë dhe gaz lotsjellës për shpërndarjen e protestuesve. Pika më e nxehtë e përplasjes ka qenë në sheshin Willson, në zonën e Tiranës së Re, ku policia kërkonte shpërndarjen e turmës dhe kalimin e automjeteve.
Edhe pse deputetët e opozitës u përpoqën për të ndaluar aksionin e autobotit me ujë, nuk ia arritën dot, gjë që solli shpërndarjen e protestuesve dhe qetësim të situatës.
