Ish-kryeministri, Sali Berisha, në një dalje për mediat në përfundim të mbledhjes së kryesisë, është shprehur se beteja e opozitës do të vazhdojë.
Ai theksoi se do të ketë betejë të çdo forme duke paralajmëruar ture dhe protesta.
“Ju e dini që para 1 jave deputetët nisën betejën pa kthim kundër këtij regjimi. Në këtë kontekst kjo betejë nuk kishte të bënte asgjë me zhvillimet e mëvonshme, por ato nuk ishin të paparashikuara. Edi Rama kur pa deputetët në vendosmëri absolute të qëndrojnë për të drejtat që ai shkelmon, mendoi se duke hapur një proces antidemokratik do na dekurajonte, por e vërteta është se doli e kundërta. Beteja do vazhdojë.
Kjo është një betejë kundër diktaturës së instaluar të bazuar në drogë, krim e asgjësimin e opozitës. Opozita ndodhet para de facto asgjësimit të saj nëse vazhdon kështu. Ditën e enjte deputetët të betuar se nisin betejën pa kthim shënon kthesë në qëndresën tonë për rivendosjen e pluralizmit në vend.
Çdo formë beteje do ketë. Ju garantoj. Do të zhvillojmë ture dhe protesta. Edi Rama nuk pranon opozitë tjetër veç asaj që kontrollon. Asgjë nuk ka ndryshuar në qëndrimin tonë si opozitë, nuk pranojmë të jemi opozitë fiktive”, u shpreh ai.
