Presidenti Bujar Nishani ka folur sot për Klement Balilin, shkarkimin e Ylli Manjanit si dhe çështje të tjera të aktualitetit politik. Në një intervistë për Çim Pekën në Syri.net, Nishani deklaroi se Klement Balili përbën kërcënim serioz për Sigurinë Kombëtare.
“Për herë të parë për një çështje konkrete, nuk është një emër konkret është një çështje konkrete. Për herë të parë një krye trafikant nuk vepron në mënyrë të izoluar për një çështje që thashë dhe jo pa qëllim dhe jo pa fakte ka tejkaluar kufijtë e Shqipërisë një çështje e cila ka marrë vëmendjen dhe shqetësimin e agjencive më të mëdha ligjzbatuese në nivel global në luftën kundër krimit të organizuar dhe trafikut të drogës. Pra nuk është një individ është një çështje me përmasa ndërkombëtare dhe nuk është për herë të parë, por është një vijimësi të mbledhjes së parë që bëri KS, për çështjet e trafikimit”, deklaroi Kreu i Shtetit.
I pyetur nëse është ngritur ky shqetësim më parë nga partnerët ndërkombëtarë, Nishani kujtoi deklaratat e ambasadorit amerikan Donald Lu.
“Patjetër përderisa është bërë një deklaratë publike nga ana e ambasadorit të SHBA-ve në Tiranë, është një mesazh i qartë madje shumë i mirëpritur dhe i vlerësuar që ka pas ndjeshmërinë e qeverisë së SHBA-ve, sepse ambasadori amerikan përfaqëson qeverinë e SHBA-ve dhe ky do të thotë se është një shqetësim i SHBA-ve. Pra jo emri konkret por çështja dhe fenomeni. Pra përderisa është një deklaratë publike është një adresim që i bëhet Presidentit të Republikës, kryeministrit, qeverisë, policisë, prokurorisë të gjitha institucioneve dhe shoqërisë shqiptare”, tha ai.
