Ish-Presidenti Bujar Nishani në krah në kandidates për kryetare të PD Edith Harxhi, tha nga Korça se PD është në një udhëkryq, në një situatë të rënduar, ndërsa foli se mes tyre ka 4-5 njerëz që bëjnë biznese në bashkëpunim me qeverisjen.
Edhe pse nuk e përmendi emrin e kryetarit Basha, Nishani tha ndër të tjera se mundet që disa njerëz të jenë komodë në opozitë.
“Kemi ardhur duke rrudhur PD, duke e larguar nga qytetarët, duke e mbyllur brenda një grupi të vogël njerëzit, mundet që disa persona të jenë komod në opozitë, por ndjej hallin e mijëra demokratëve, jo me 4-5 njerëz që bëjnë biznese të caktuara në bashkëpunim me qeverisjen, na prekupon halli i një shoqërie që zhytet dhe s’di se ku do të dalë. Jemi në një udhëkryq, në një situatë të rënduar, momente dramatike por në këto momente shpesh shënohet historia, historinë e PD do e bëjnë demokratët dhe të Shqipërisë do e bëjnë shqiptarët”, tha Nishani
Më tej, Nishani e ka cilësuar manipulative deklaratën e Bashës për një masakër elektorale, të cilën ai e cilësoi tezë.
“Sot PD është në një situatë kaotike, dëshpërimi, zemërthyerje, por a mund të mbetemi peng i këtij momenti? Unë mendoj që jo. PD ka resurse dhe forca të panumërta. Përtej zemërthyerjes dhe goditjes së fortë duhet të projektojmë PD-në e së nesërmes. Duke qenë se jemi në fushatën për zgjedhjen e kryetarit unë dua të përfitojë nga rasti, ka qenë një fushatë e pabarabartë, e vështirë, përballë një makinerie qeveritare që nuk njeh rregulla dhe as kode. Ka qenë një situatë që është përballuar vetëm për shkak të dinjitetit dhe sakrificave të çdo demokrati. Ky dëshpërim u thellua më keq pas 25 prillit se pritshmëritë tona ishin më të mëdha sepse shqiptarët kishin përballë një qeverisje të korruptuar. Me të drejtë të gjithë do të rendisë vështirësitë, padrejtësitë, dhunën, manipulimet, blerjen e votës. Kur një parti opozitare fiton besimin e shumicës së qytetarëve, ato shkojnë të votojnë pa marrë parasysh forcën e shtetit dhe bën përmbysjen e qeverisë. Jam i bindur që ky regjim, apo model qeverisjeje, nuk mund që ta ndryshojmë vetëm përmes kërkesave tona publike apo ekzistencës, por e rrëzojmë atë përmes aktivitetit dhe kontributeve dhe këtu duhet të fillojë analiza dhe reflektimi dhe projektimi i një të nesërme, nuk do kishte vlerë nëse do mbesnim peng të së drejtës. E padrejtë dhe spekulative tezën që fitoi Rama për masakër elektorale, kjo është manipulative për demokratët. Pyetja duhet të ishte a i fitoi apo i humbi PD zgjedhjet”, tha Nishani ndër të tjera./Opinion.al
