Me rastin e 100-vjetorit të shpalljes së Tiranës, kryeqytet i Shqipërisë kryeministri Rama ishte sëbashku me kryebashkiakun Veliaj në një ceremoni të zhvilluar në Pallatin e Brigadave.
Në fjalën e tij përshëndetëse kryeministri Rama tha se Tirana është një qytet ku të gjithë duan të kthehen. Për të mbështetur këtë ai tha se për “për postin e ambasadorit të BE në vende të ndryshme brenda unionit kishte 9-10 aplikime, për në Tiranë kishte 40”.
“Mbasi ke qenë në Tiranë, s’ka kontinent që ta mbush syrin”, tha Rama duke cituar fjalët e një diplomati europian të cilit nuk ia përmendi emrin.
“Mbase këta që vijnë nga BE janë të lodhur me shumë rregull dhe shumë disiplinë, standarde e monotoni. Mbase ata që vijnë nga Amerika janë të lumtur pasi këtu ndihen si Papa kur shkon në Argjentinë. Mbase të tjerët mendojnë se vijnë në mes të Europës dhe papritur gjejnë gjëra që Europa nuk i ka”, u shpreh ai.
Ndër të tjera Rama kujtoi dhe një episod kur një “vip ndërkombëtar” siç e quajti ai, kur kishte ardhur në Tiranë nuk kishte pranuar të dilte nga aeroporti pa automjet të blinduar por më pas ishte shprehur i habitur për atë që kishte parë.
“Dua ta vazhdoj me një vip ndërkombëtar kuptohet nga një vend shumë serioz i cili erdhi në Tiranë dhe nuk dilte nga aeroporti i Rinasit, kishte ardhur me polic edhe me gazetarë. Sigurisht erdhi të japi mesazhe të forta për luftën kundër krimit kuptohet, është gjëja më e kollajshme që mund të bësh kur nisesh nga diku për të ardhur ktu sepse kjo funksionon andej dhe nuk dilte nga aeroporti i Rinasit. Nuk dilte nga ajo salla vip sepse kërkonte makina të blinduara dhe automatik, kishte idenë se kishte ardhur në një vend që rrugës mund ta vrisnin mund ta rrëmbenin, mund ta torturonin, mund ta martonin me zor, nuk e di. Mbas shumë minutash negociata, u detyruam sepse erdhi deri tek unë fjala, i thashë ktë shërbim me makina të blinduara, me kallashnikovë, nuk e ofrojmë, nuk e kemi në portofolin e ofertave tona kështu që kthehu. Vendosi të vinte, sakrifikoi deri në Tiranë, arriti gjallë dhe të nesërmen në mëngjes erdhi tek unë. Më tha të kërkoj shumë falje sepse ndjehem në vështirësi. Pse i thashë. Sepse kam parë shumë vende po kurrë nuk kam parë veten time kaq budalla që ajo që prisja të jetë komplet e kundërta me atë që gjeta”, tha Rama. /Opinion.al
