Tirana duket se do të jetë një qark i vështirë në zgjedhjet e 25 Prillit, kur në fakt historia elektorale ka treguar se fituesi i Tiranës është tradicionalisht edhe fituesi i zgjedhjeve.
Për Nënkryetarin e Bashkisë së Tiranës Arbian Mazniku PS merr në Tiranë 18 mandate dhe garon për mandatin e 19-të.
Ndërkohë analisti Artan Hoxha duke ju referuar sondazheve, shprehet se Tirana është në barazim, dhe do të mjaftonte ky barazim në Tiranë për ta nxjerrë opozitën fituese në të gjithë vendin.
“PS në Tiranë do të marri sigurisht 18 mandate dhe është në garë për të marr deputetin e 19-të. PS në Tiranë ka një rezultat stabël prej shumë vitesh, ku PS në bashkinë e Tiranës është tipikisht 50-51%, ndërkohë që qarku vinte me mungesë nga Kamza, Vora, Kavaja dhe Rrogozhina. Gjasat janë që nga bashkia e Kamzës, bashkia e Vorës, Kavajës dhe Rrogozhinës, PS do vijë me një rezultat mbi 50%. Kjo do ndihmojë që me 50-51% që ka bashkia Tiranë, jo vetem merr mandatin e 18-të por garon për 19”, tha Mazniku.
Ndërkohë duke ju referuar sondazhit të Ora news, Artan Hoxha tha: “Sërish do t’i referohem sondazhit publik, që e nxjerr barazim – plus opozita . Që do të thotë opozita lëviz nga disavantazhi në barazim. Mjafton edhe barazimi në Tiranë, sepse Tirana veçanërisht qyteti, është poli ku ka një ardhje demografike goxha të madhe. Kush ka më shumë kurajo të vijë në Tiranë? Ata që janë të lidhur me pushtetin”, tha Hoxha.
I pyetur si do të ndikojë kjo në lloogarinë e përgjithshme, Hoxha u shpreh: “Edhe me barazim në qarkun e Tiranës, opozita e ka të fituar në rang Shqipërie, le po të ketë pastaj plus 1”. /Opinion.al
