Komisioni i Ligjeve në Parlament është duke diskutuar kërkesën për shkarkimin e Presidentit Meta që u dorëzua javën e kaluar me firmat e 55 deputetëve të mazhorancës. Ky reagim erdhi pasi ata e konsideruan anti-kushtetues dekretin e Metës i cili vendosi të shfuqizojë 30 qershorin si datë zgjedhjesh lokale.
Deputeti i Partisë Soclialiste, Bashkim Fino tha se anti-kushtetushmëria e vendimit të presidentit i ka bërë ata që ta marrin ‘me dhimbje’ këtë masë. Ai komentoi letrën që Meta i drejtoi kuvendit me gjithë argumentet që e shtynë të nënshkruante dekretin. Sipas Finos gjuha e përdorur në letër është ‘është ironike, paragjykuese dhe hipokrite’.
“Presidenti ka marrë një copë letër, ka shkruar çfarë ka dashur dhe i ka vendosur emrin dekret. Ajo që më bën përshtypje është letra që presidenti i ka dërguar Kuvendit të Shqipërisë për argumentet e ç’dekretimit. Gjuha e përdorur prej tij është ironike, paragjykuese dhe hipokrite. Jemi përpara një shkelje të nenit 92 të Kushtetutës dhe me dhimbje kemi marrë këtë masë që po ia paraqesim Parlamentit” tha Bashkim Fino.
Kujtojmë se në fjalën e tij në kuvend gjatë debatit të zhvilluar për rezolutën ndaj dekretit të presidentit, Fino tha se ai e ka shkelur Kushtetutën por shkarkimi i tij nuk është zgjidhje. Ai ishte një ndër të paktët zëra bashkë me Pandeli Majkon që dolën kundra nismës për shkarkim të Metës.
Ndërkohë deputeti tjetër socialist në komision, Spartak Braho kujtoi se nuk është kompetencë e Komisionit të Ligjeve që të marrë vendimin për shkarkimin e presidentit por ata duhet të vendosin ngritjen e Komisionit Hetimor që do të përcaktojë nëse presidenti ka bërë ose jo shkelje të rëndë të Kushtetutës.
Në komision foli dhe deputeti Ralf Gjoni i cili e cilësoi si të nxituar dhe të motivuar politikisht nismën për shkarkimin e Metës.
“Mendoj se është i nxituar vendimi për të shkarkuar presidentin, pasi ende nuk kemi të bëjmë me një akt për të delegjitimuar Parlamentin. Mua më duket se kjo procedurë shkarkimi është një lojë politike që ju po bëni dhe është e pabazuar në Kushtetutë. Është një lojë që po hapet për të bërë zhurmë mediatike”, u shpreh Gjoni. /Opinion.al
