Ish- lojtari i kombëtares Italiane Marco Materazzi është rikthyer përsëri të flasë për episodin e famshëm të finales së Kupës së Botës ‘Germany 2006’.
Në një intervistë të dhënë për të përditshmen ‘Libero’ Materazzi është shprehur: ‘ Unë nuk e urrej Zidane, edhe pse shumë janë të këtij mendimi. E dua Zidane, jo sepse më dha një goditje me kokë, por sepse më dha një Kupë Bote’.
Nga ana tjetër ish-mbrojtësi i Interit ka folur edhe për mospjesmarrjen e kombëtares Italiane në Botërorin ‘Rusi 2018’.
“E kam përcjellë me keqardhje të madhe eleminimin e Italisë. Në fakt, që me rënien në grupin e Spanjës, kombëtarja jonë ka pasur pak fat të keq. Por, nëse nuk fitoni, ose shënoni një gol ndaj Suedisë, çfarë mund të thuash e të presësh?” ka theksuar ish- mbrojtësi Italian.
Ndërkohë ka dhënë edhe një vlerësim për gjendjen aktuale të skuadrës së Interit.
‘Më pëlqen shumë Skriniar, po rritet. Ka cilësi të mëdha fizike, është shumë i shpejtë, shumë më i mirë se unë. Icardi ? Mendoj se tifozët e Interit duhet të shikojnë golat, jo jetën private. Mendimi im për Interin pas Moratit ? Unë kam qenë me fat të mjaftueshëm për të shkuar në Kinë nga ‘Suning’. Roma nuk u ndërtua brenda një dite dhe besoj se kinezët e dinë se çfarë po bëjnë’ ka përfunduar Marco Materazzi.
