Një kompani në Verona ka prodhuar maska me portretin e Musolinit dhe mbishkrimin: “Ec, ndërto dhe nëse është e nevojshme lufto dhe fito!”, një nga deklaratat e Duçes.
Në rrjetet sociale ka nisur menjëherë një lum me kritika dhe komente, ndonëse nuk kanë munguar edhe qëndrimet pozitive mbi këtë iniciativë. Por ndërkohë, online mund të gjenden edhe produkte të tjera të dedikuara marketimit të Musolinit.
“Mes shumë gjërave që mund të ndodhin në një pandemi, kjo e shitjes së maskave për mbrojtje individuale me fytyrën e Duçes fashist është më e pakëndshmja nga të gjitha”, ka thënë senatori demokrat Vincenzo D’Arienzo.
“Edhe një herë për shkak të atyre pak njerëzve pa respekt imazhi i Veronës është dëmtuar: është e patolerueshme që në qytetin e Medaljes së Artë për rezistencën të qarkullojnë maska me fytyrën e Musolinit, i cili ka qenë përgjegjës për ligjet raciste, për masakrimin e mijëra italianëve në luftën e tij krah Hitlerit dhe për shkatërrimin e vendit tonë”, ka thëne deputeti veronez, Diego Zardini.
Sjellim në vëmendje që pikërisht më 9 Maj, bota kujton kapitullimin e nazizmit, me firmosjen e aktit të dorëzimit në vitin 1945./Opinion.al
