Komiteti Teknik i Ekspertëve për COVID-19 në vendin tonë kanë deklaruar se të gjitha masat e marra deri më tani kundër pandemisë do të vijojnë pa afat.
Zv. ministrja e Shëndetësisë, Mira Rakacolli ka paralajmëruat se nëse situata do të përkeqësohet do të ashpërsohen masat kufizuese.
“Komiteti i Ekspertëve mori vendimin unanim për t’i vijuar këto masa. Ndalohen tubimet, konferencat, ceremonitë e festave dhe ato mortore. Do vazhdojë të jetë në fuqi kufizimi i lëvizjes së qytetarëve nga ora 22:00 deri në orën 06:00. Do të kufizohet në këto orare edhe puna në Fast-Food. Universitetet do të vazhdojnë online, administrata do të punojë online, ndërsa shkollat me mësim të alternuar. Këto masa do të vijojnë për një periudhë pa afat”, –tha Rakacolli .
Zv. ministrja përjashtoi mundësinë e një propozimi të mbylljes totale të fundjavës.
“Rikthimin e izolimit në fundjavë nuk e kemi diskutuar si diçka që mund të ndodhë. Presim si do të shkojë situata për të marrë vendime të tjera,”-tha ajo.
Ndërkohë, specialistja e ISHP-së, Eugena Tomini u shpreh se masat aktuale po japin rezultat duke sjell një ulje të lehtë të rasteve të reja.
“Vendi po vijon me intensitet të lartë me koronavirus. Incidenca vijon e lartë, kemi kaluar në 347 raste për 100 mijë banorë. Në javën e fundit kemi një tendecë në ulje. Duhet të theksohet se Tirana mban peshën kryesore, e ndjekur nga Gjirokastra dhe qarku i Lezhës. Java e fundit ka treguar një ndikim të masave të fundit”, u shpreh Tomini./ Opinion.al
