Masakra e Elbasanit, asnjë i arrestuar, pyeten 46 persona

46 persona janë shoqëruar gjatë natës në qytetin e Elbasanit, pas ngjarjes së rëndë të ndodhur mbrëmë ku humbën jetën 3 persona dhe u plagosën 6 të tjerë. Forcat RENEA, ato të FNSH-së si dhe Policia e Elbasanit kanë ushtruar dhjetra kontrolle në banesa në Elbasan, Peqin, Cërrik, Librazhd e Gramsh. Gjithashtu kontrolle ka patur edhe në akset rrugore dhe në automjetet e dyshuara se mund të lëviznin autorët. Sipas njoftimit të policisë janë krehur më këmbë zona kodrinore ku dyshohej se mund të fshiheshin autorët apo që mund të kishin braktisur makinën. Forca e policisë kanë kontrolluar rreth 150 garazhde. Ndërkohë grupi hetimor ka sekuestruar në vendngjarje 2 armë zjarri automatik që dyshohet se i kanë lënë autorët e krimit, dy krehra pa fishekë, një krehër tjetër me 26 fishekë si dhe 65 gëzhoja.
Një grup specialistësh të Krimeve të Rënda në Drejtorinë e Policisë së Shtetit të kryesuar nga Drejtori i Krimeve të Rënda në bashkëpunim me Specialistët për Krimet e Rënda në Drejtorinë e Policisë Elbasan si dhe me Prokurorinë e rrethit Gjyqësor Elbasan po vijojnë punën për zbardhjen e ngjarjes.