Pas reagimit të Policisë së Kosovës lidhur me marrëveshjen mes Kosovës dhe Shqipërisë për huazimin e gazit lotsjellës të përdorur në protestat e opozitës, ka reaguar edhe ish-ministri i Jashtëm i Kosovës, Behgjet Pacolli.
LEXO EDHE – Gazi lotsjellës në protestat e Tiranës, reagon Policia Kosovës
Në raportimin e djeshëm të mediave në Kosovë lidhur me këtë çështje thuhet se në mënyrë që marrëveshje të shkonte përpara duhej që formalisht të merrej edhe vula e ministrit të Jashtëm që në atë kohë ishte Pacolli. Megjithatë ky i fundit ka mohuar çdo përfshirje të tijën në këtë histori.
“Kam ndjekur diskutimet për çështjen e transferimit të gazit lotësjellës nga Policia e Kosovës në Shqipëri. Njerëzit me qëllim të keq kanë lakuar emrin tim në këtë çështje dhe dua ta bëj të qartë një gjë. Ministria e Punëve të Jashtme gjatë mandatit tim nuk ka lëshuar asnjëherë leje për transferimin ose shitjen e gazit lotësjellës ose ndonjë pajisje tjetër policore në Shqipëri ose në ndonjë vend tjetër”, ka shkruar Pacolli në Facebook.
Ai shton se përpjekja për të përfshirë Ministrinë e Jashtme në këtë çështje “motivohet nga dikush që dëshiron të çoroditet politikisht dhe synon vetëm ta dëmtojë emrin tim”. Pacolli paralajmëron gjithashtu se do të kërkojë marrjen e masave ligjore “kundër të gjithë atyre që gënjejnë, sepse ata duhet të mbahen përgjegjës për fjalët e tyre publike”.
Një ditë më parë mediat në Prishtinë raportuan se gazi i përdorur në protestat e opozitës nga Policia shqiptare ishte marrë në Kosovë. Sipas raportimeve, thuhet se mes Tiranës dhe Prishtinës ishte bërë një marrëveshje sekrete, ndërkohë që kryeministri Edi Rama thoshte se gazi ishte aty që në kohën e Qeverisë “Berisha”, pas protestës së 21 janarit 2011.
LEXO EDHE- Gazi lotsjellës kundër opozitës, marrëveshja sekrete që e solli nga Kosova
Për këtë lajm reagoi edhe policia e Kosovës e cila tha se për këtë marrëveshje është marrë pëlqimi i të dyja palëve dhe se ajo është konfrom të gjitha ligjeve. /Opinion.al
