BBC i ka kushtuar një artikull marrëveshjes mes Shqipërisë dhe Italisë, të firmosur një ditë më parë nga kryeministria italiane Giorgia Meloni dhe kryeministri shqiptar Edi Rama për ngritjen në vendin tonë të dy qendrave të emigrantëve, ku do të strehohen shtetasit e huaj që do të deportohen nga Italia.
Në artikull thuhet se marrveshja është kundërshtuar nga politikanët e opozitës në të dy vendet.
Sipas BBC, Italia po vuan prej kohësh nga kriza e emigrantëve dhe kjo mund të jetë një nga shumë përpjekjet e kryeministres Meloni për ta luftuar këtë fenomen.
Sakaq, Andrea Costa, president i shoqatës së ndihmës së emigrantëve, në një prononcim për BBC tha se qendrat rrezikonin të bëheshin “si një Lampeduza në brendësi të Shqipërisë”, duke iu referuar ishullit italian që është një nga portet kryesore të mbërritjes për njerëzit që duan të arrijnë në Evropë.
Artikulli i BBC:
Italia do të ndërtojë dy qendra në Shqipëri për të pritur dhjetëra mijëra emigrantë të paligjshëm, tha kryeministrja Giorgia Meloni.
Ajo e bëri të ditur planin në një konferencë për shtyp me kryeministrin shqiptar Edi Rama në Romë.
Meloni tha se qendrat që do të hapen pranverën e ardhshme, do të kenë kapacitete për një numër deri në 36,000 njerëz në vit.
Plani do të zbatohet për emigrantët e shpëtuar në det nga anijet italiane dhe jo për ata që mbërrijnë në brigjet italiane.
Sipas Melonit, emigrantët do të qëndrojnë në këto qendra, ndërsa Italia shqyrton kërkesat e tyre për azil. Ajo shtoi se plani nuk do të zbatohet për gratë shtatzëna, fëmijët dhe njerëzit në nevojë.
Ajo tha se strukturat, të cilat do të ndërtohen me shpenzimet e Italisë, do të jenë në gjendje të strehojnë 3,000 njerëz çdo muaj “për kohën e nevojshme për të përpunuar shpejt kërkesat për azil dhe, nëse është e nevojshme, për riatdhesim”.
Qendrat do të ndërtohen në portin e Shëngjinit dhe zonën e Gjaderit në veriperëndim të Shqipërisë. Personeli i sigurisë dhe oficerët e policisë do të sigurohen nga Shqipëria.
Zonja Meloni tha se, megjithëse Shqipëria nuk është një vend anëtar i BE-së, “ajo tashmë po sillet si një e tillë”. Ajo shtoi se beson se “Shqipëria është, për të gjitha qëllimet, një vend europian” dhe shprehu mbështetjen e saj për hyrjen e Shqipërisë në BE.
Duke folur në italisht, zoti Rama përdori fjalë të ngrohta për të përshkruar marrëdhëniet e vendit të tij me Italinë, duke thënë se qytetarët dhe institucionet e Italisë i kishin ndihmuar shqiptarët në vitet 1990 pas rënies së regjimit komunist.
“Ky borxh nuk mund të shlyhet”, tha Rama. “Por nëse Italia thërret, Shqipëria përgjigjet”, shtoi ai.
Rama shtoi: “Të gjithë mund ta shohin që kjo është një situatë e vështirë për Italinë. Gjeografia është bërë mallkim për Italinë, sepse nëse arrin në Itali, arrin në BE. Por kur bëhet fjalë për menaxhimin e këtyre ardhjeve si BE, ne dimë si shkojnë gjërat”.
“Mund të mos kemi kapacitetin për të qenë zgjidhja e vetme, por kemi për detyrë të… ndihmojmë Italinë”, shtoi ai.
Zoti Rama tha se ai dhe zonja Meloni diskutuan marrëveshjen e qendrës së emigrantëve ndërsa kryeministrja italiane ishte me pushime në Shqipëri gjatë verës.
Politikanët e opozitës si në Itali ashtu edhe në Shqipëri e kanë kritikuar marrëveshjen.
Riccardo Magi, kreu i partisë liberale italiane +Europa (Më shumë Evropë), tha se plani ishte “i frikshëm” dhe se qendrat do të ishin si “një lloj Guantanamo italiane”.
Duke shkruar në X, i njohur më parë si Twitter, Magi tha: “Është gjithashtu një marrëveshje e paligjshme: Italia nuk mund të dërgojë njerëz të shpëtuar në det në një vend jashtë BE-së, sikur të ishin pako ose mallra”.
Belind Kelliçi i Partisë Demokratike të Shqipërisë kritikoi “mungesën e transparencës” rreth marrëveshjes.
“Kjo është tradhti ndaj Shqipërisë dhe është pabesia më e madhe që Rama mund t’i bëjë vendit tonë”, shkruan Kelliçi në X.
Antishqiptari më i madh sot quhet Edi Rama, i cili çdo vit dëbon qindra mijëra të rinj nga vendi për t’i zëvendësuar me emigrantë të paligjshëm.
Andrea Costa, president i shoqatës së ndihmës së emigrantëve me bazë në Romë, Baobab Experience, i tha BBC-së se njoftimi “kapi të gjithë në befasi” dhe tregoi se politikat e qeverisë italiane të imigracionit “po shkonin në drejtimin e gabuar”.
Zoti Costa tha se qendrat rrezikonin të bëheshin “si një Lampeduza në brendësi të Shqipërisë”, duke iu referuar ishullit italian që është një nga portet kryesore të mbërritjes për njerëzit që duan të arrijnë në Evropë.
Ai iu referua gjithashtu përpjekjes së qeverisë britanike për të dërguar mijëra azilkërkues në Ruandë, duke thënë: “Ne nuk e dimë nëse qendrat në Shqipëri do të jenë një lloj Guantanamo, një Lampedusa, një Ruanda, apo pak nga të gjitha”.
Meloni, e cila kryeson partinë e krahut të djathtë, nacionalist Vëllezërit e Italisë, është e njohur për pikëpamjet e saj të vendosura kundër emigracionit. Që kur u bë kryeministre, ajo ka njoftuar një sërë ndërhyrjesh për t’i dhënë fund emigracionit të paligjshëm, duke përfshirë ndalimin e migrantëve të parregullt.
Megjithatë, më shumë se 145,000 emigrantë kanë hyrë në Itali këtë vit, 52,000 më shumë se e njëjta periudhë në 2021.
Në prill, ministrat italianë shpallën një gjendje të jashtëzakonshme gjashtëmujore në përgjigje të rritjes së numrit të emigrantëve që kalojnë Mesdheun nga Afrika e Veriut.
