Bota

Marrëveshja bërthamore,Irani:Pretendimet e fuqive evropiane të papabazuara


               Publikuar në : 13:11 - 20/01/20 |
el ida

Zëdhënësi i Ministrisë së Jashtme iraniane, Abbas Musavi, tha se Irani vazhdon të jetë pjesë e marrëveshjes bërthamore të vitit 2015, pavarësisht se është tërhequr nga angazhimet që ajo kërkon.

“Teherani mbetet pjesë e marrëveshjes. Pretendimet e fuqive evropiane se Irani shkel marrëveshjen, janë të pabazuara. Nëse Irani do të zvogëlojë më tej angazhimet e tij bërthamore, do të varet nga palët e tjera”, tha Musavi, në një konferencë për media në Teheran.

Kjo deklaratë vjen pak ditë pasi, presidenti iranian, Hassan Rohani pohoi se Irani është duke rritur pasurimin e uraniumit më shumë se në vitin 2015, vit kur ka nënshkruar marrëveshjen bërthamore me fuqitë botërore.

Marrëveshja parashikonte kufizim të aktivitetit bërthamor nga Irani, në këmbim të lirimit nga sanksionet ekonomike.

Irani ka tejkaluar normat e përcaktuara për rezerva të ujit të rëndë dhe uraniumit të lejuar, si dhe për numrin e centrifugave që i duhen për pasurim të uraniumit, në përgjigje të fushatës me sanksione të Shteteve të Bashkuara, pasi presidenti amerikan, Donald Trump është larguar nga marrëveshja bërthamore më 2018.

Trump tha asokohe se dëshiron të negociojë një marrëveshje të re që mund të ndalojë vërtetë aktivitetin e programit bërthamor dhe kufizimin e programit të raketave balistike të Teheranit.

Pesë vendet e tjera që kanë nënshkruar marrëveshjen, Britania, Franca, Gjermania, Kina dhe Rusia u zotuan ta mbanin marrëveshjen, mirëpo partnerët evropianë nuk kanë gjetur rrugë për t’i ofruar Teheranit shitjen e naftës së papërpunuar jashtë shtetit për shkak të sanksioneve amerikane, të cilat kanë dëmtuar rëndë sektorin bankar dhe atë të naftës në Iran./Opinion.al

Pas