Nesër në Maqedoninë e Veriut do të mbahet raundi i dytë i votimeve për Presidentin e Republikës. Stevo Pendarovski, i mbështetur nga koalicioni qeveritar i kryeministrit Zaev, dhe Gordana Silianovska, e përzgjedhura e partisë opozitare VMRO-DPMNE, kanë theksuar edhe njëherë rëndësinë e pjesëmarrjes së qytetarëve në votim dhe nevojën e stabilitetit politik të vendit.
Në raundin e parë të votimeve, kandidati shqiptar Blerim Reka mori rreth 80 mijë vota, që përkthehen në 10,3% të totalit. Do të jenë pikërisht këto vota që do të vendosin se cili do të jetë kreu i ri i shtetit.
Por jo vetëm kaq. Kusht që Maqedonia e Veriut të zgjedhë të dielën presidentin e gjashtë të saj është që pjesëmarrja të jetë mbi 40%. Përndryshe, vendi do të shkojë në zgjedhje të parakohshme, siç ka deklaruar kryeministri Zoran Zaev, me një presidencë disamujore të kryetarit aktual të Parlamentit, Talat Xhaferi.
Thirrje për pjesëmarrje masive kanë bërë edhe krerët e BDI-së, partisë më të madhe të shqiptarëve në vend, ndërkohë që udhëheqësit e dy partive shqiptare të opozitës, që mbështetën kandidatin e tyre Blerim Reka në raundin e parë, u janë drejtuar përkrahësve të tyre të votojnë sipas ndërgjegjes.
Në zgjedhjet e raundit të parë, pjesëmarrja në votime ishte shumë e ulët, ku të drejtën e votës e ushtruan vetëm 42% e qytetarëve./Opinion.al
