Ylli Manjani foli ashpër dhe tha se nuk e ka më problem nëse koalicioni vazhdon apo ndalet. Dua ti them gjërat ashtu siç jam dhe më pas do vazhdoj të punoj avokat. Kështu deklaroi në një dalje për mediat, ministri i shkarkuar i Drejtësisë.
Ndër shkaqet që kanë çuar në përplasjen e tij me Edi Ramën ai veçoi çështjen e Klement Balilit. Deklarata e bërë në emisionin ‘Opinion’ javën e shkuar, ku i vuri fajin Policisë së Shtetit për mos arrestimin e Tahirit, sipas Manjanit, ka zemëruar Kryeministrin Rama, i cili i ka ushtruar presion Ilir Metës për të rënë dakord që të shkarkojnë Manjani nga Ministria e Drejtësisë. “Nuk më ka kërkuar mua, por Kryetarit të LSI-së, Ilir Meta. Arsyeja ishte se pse unë flisja pa leje në media. Sepse sipas tij duhet të merrja leje tek drejtori i tij Endri Fuga”, ka thënë Manjani.
Më tej ai ka hedhur poshtë çdo akuzë që i është bere për lidhjen e tij me Klement Balilin. “Nuk është rastësi që dosja e Klement Balilit lidhej me emrin tim. Kur unë kërkoja që ai të arrestohej Ministrat e Ramës flinin me dashnoret në hotelin e tij. Kjo qeveri është e kapur…”, tha më tej ai.
“Kjo detyre nuk është bërë, nuk është arrestuar, ky është fakti, sepse policët flenë tek “Santa Quaranta”. Ky person duhet të ishte arrestuar. Mua më çuan deri në Dubai, unë në Dubai s’kam qënë kurr në jetën time, ndërkohë që unë shkoja në udhëtimin imagjinar, ata ishin bashkë”, është shprehur Ylli Manjani.
