Konflikti në familje është pista kryesore në të cilën është përqendruar grupi hetimor për të zbardhur vrasjen e Mirash Djaloshit.
Ai u gjet i masakruar me çekiç në kokë mëngjesin e së premtes në fshatin Shkallë të Shijakut. Policia u sinjalizua nga familjarët e viktimës 54 vjeçar, ishkryeplak i fshatit për më shumë se 15 vjet.
Burime nga grupi hetimor konfirmojnë se është verifikuar pista e ndonjë konflikti të mundshëm të viktimës me persona të tjerë, jashtë rrethit familjar e farefisnor, dhe rezulton se nuk ka pasur asnjë konflikt të hapur.
Sipas të dhënave të Policisë, pavarësisht se konsumonte alkool, Mirash Djaloshi kishte marrëdhënie shumë të mira me bashkëfshatarët e tij, të cilët e zgjodhën për gati dy dekada si të parin e fshatit.
Në këto kushte, vëmendja kryesore e grupit hetimor është përqendruar te konflikti në familje, pasi rezulton se kryefamiljari kishte pasur grindje, sidomos me djalin e tij Ardianin, ditët e fundit.
I nxitur nga alkooli, 54vjeçari kishte nisur grindjet me familjarët e tij, teksa të birit i kërkonte punë, pasi situata ekonomike në familje ishte shumë e vështirë.
Djali i madh i familjes mësohet se para pak muajsh kishte dalë nga burgu, ku vuajti dënimin për veprën penale të vjedhjes.
Pasi doli nga burgu, djali rreth 22 vjeç nuk angazhohej në asnjë drejtim, ndaj i ati i kërkonte që të punonte.
Mësohet se familjarët e viktimës kanë dhënë deklarata kontradiktore para oficerëve të Policisë. Sipas tyre, kryefamiljari kishte dalë pasditen e së enjtes rreth orës 19:00 nga shtëpia dhe nuk ishte kthyer.
Por, nuk kanë mundur të justifikonin prezencën e aparatit celular të kryefamiljarit, i cili ndodhej në shtëpi, ndërkohë që ai u gjet i pajetë pak metra larg banesës.
Policia ka zbuluar se në celularin e viktimës nuk kishte asnjë thirrje të dyshimtë apo mesazh kërcënues dhe ka intensifikuar hetimet në drejtim të konfliktit familjar.
“Kemi hetuar dhe pyetur me dhjetëra persona rreth karakterit të viktimës, por rezulton se ka gëzuar respekt në fshat. Kemi verifikuar dyshimet për ndonjë konflikt të mundshëm, por rezulton person i shoqërueshëm dhe pa konflikte. Dyshimet tona kryesore janë fokusuar te konflikti familjar, por paralelisht po verifikojmë edhe në drejtime të tjera”, u shprehën burime nga grupi hetimor.
Mirosh Djaloshi u gjet i vrarë pak metra larg banesës së tij mëngjesin e së premtes, i goditur pas koke disa herë me çekiç./ Panprama.al
