I ashpër ishte presidenti Ilir Meta me ndërkombëtarët në lidhje me krizën politike. Por i pyetur nëse me qëndrimet e tij po e vë Shqipërinë kundra SHBA-ve, Meta tha se diplomaten amerikane ka folur shumë qartë.
“Marrëdhëniet e mija me SHBA, kanë qenë, janë dhe do të jenë të kristalta dhe jashtë çdo fijeje dyshimi. Se çfarë kam biseduar unë me ta mund të them vetëm kaq, se kam qenë i qartë dhe i drejtë. Votimet i vlerëson OSBE/OHDIR pastaj këto lojërat e ambasadave nuk merrem. Besoj se mesazhet e zonjës Glover kanë qenë tepër të qarta dhe në raport me dekretin e Presidentin dhe marrëdhënieve juridike. Shumë nga arsyet ligjore që shoqëronin dekretin tim ishin dhe në shqetësimet e raportit të zonjës Glover”, tha Meta.
“Pse unë përplasje me Amerikën? Kam ndërhyrë unë në zgjedhjet të Amerikë? Kam pastruar unë para në Amerikë? O Meti nuk më nxjerr dot mua nipi i Spiro Kolekës anti-amerikan. Po të vijë kjo ditë që ai të më heqë mua vizën amerikane…Unë e kam sqaruar të ngarkuarën me punë të SHBA, e kam pyetur e keni ndonjë pyetje ose shqetësim nga ana ligjore, jo. Kam patur një takim të veçantë siç kam patur me përfaqësuesit e tjerë”, tha më tej Meta.
Presidenti tha se do të bëjë çdo gjë për të mbrojtur interesat e Shqipërisë në zgjidhjen e krizës politike, duke shkuar deri në limitet e kërcënimit.
“Kjo krizë politike nuk e ndihmon Shqipërinë. Do bëj çdo gjë për të ruajtur atë që kemi fituar në 30 vjet. Është mirë të mos e provojë askush kokëfortësinë time për mbrojtjen e interesave të Shqipërisë…është mirë. Nuk jam vetëm. Janë shumë shqiptarë. Rrugë për në Korenë e Veriut Shqipëria nuk ka për të bërë. Po u thellua kriza, do rivendosen edhe vizat”, tha Meta.
Presidenti tha se po të ishte ai në krye të opozitës, siç akuzohet nga mazhoranca, atëherë PD-LSI dhe aleatët nuk do t’i kishin djegur mandatet e deputetëve dhe tashmë do të ishin në parlament. Por Meta tha se kur opozita mori këtë vendim ai ishte në Gjermani, duke thënë njëherësh se sa keq ndihej për këtë vendim të opozitës.
“Thotë ai që unë jam koka e shtabit të opozitës. Shqiptarët ta dinë se po të isha këtu opozita nuk do i digjte mandatet. Unë isha në Gjermani. Shpirti im e di, jo i Monikës, çfarë kam hequr për të shpëtuar LSI nga 17 maji”, tha Meta./ Opinion.al
