Ministrja e Shëndetësisë, Ogerta Manastirliu, deklaroi sot në Kuvend se dy spitale Covid nuk do të kenë më kapacitet pas rritjes së numrave.
Për këtë arsye ajo tha se së shpejti do të na duhet të shtrihemi në spitalin Covid 3 dhe 4.
“Në të dy spitalet e dedikuara për Covid, kemi mbi 120 të shtruar me këtë diagnozë. Shumë shpejt do të ezaurojmë kapacitetet e të dy spitaleve dhe do të shtrihemi në spitalin e tretë dhe të katërt. Ne do të vijojmë të forcojmë kapacitetet spitalore, por më mirë të forcojmë kapacitetet apo të marrim masa secili prej nesh? Duhet të mësohemi me normalitetin e ri. Ashtu siç ishim nuk do të jemi, derisa të dalë vaksina”, tha Manastirliu.
Ministrja u tërhoqi vëmendjen edhe disa deputetëve që nuk po e mbanin maskën në sallën e Kuvendit: “Kolegë të nderuar, disa nga ju maskën nuk po e mbani. Nëse nuk e mbani ju, nuk jeni shembulli më i mirë për t’u marrë. Nuk duhet t’ju mbush unë mendjen, maska është masë e propozuar nga ekspertët”. /Opinion.al
