Qeveria e Malit të Zi e ka deklaruar ambasadorin e Serbisë person non grata.
Ministria e Jashtme foli për “ndërhyrjen e gjatë dhe të vazhdueshme në punët e brendshme të Malit të Zi” si arsyen e këtij vendimi, ndërsa i kërkoi ambasadorit serb Vladimir Bozovic të largohej nga vendi.
Një deklaratë e Ministrisë së Jashtme pohoi se Ambasadori Bozovic nuk tregoi respekt për Malin e Zi, duke e përshkruar një vendim të vitit 1918 për t’u bashkuar me Serbinë, si një akt “çlirimi” dhe “vullneti të lirë” të popullit malazez. Parlamenti i Malit të Zi e shpalli të pavlefshëm vendimin 100-vjeçar në vitin 2018, duke pohuar se ky vendim kishte prekur sovranitetin e tij, shkruan Radio Europa e Lirë.
“Pas një ndërhyrje të gjatë dhe të vazhdueshme në punët e brendshme të Malit të Zi, sjelljeve dhe deklaratave të papajtueshme me standardet e zakonshme dhe të pranueshme të zyrës diplomatike, pas disa paralajmërimeve verbale dhe të shkruara për papranueshmërinë e një sjelljeje të tillë”, thuhet në njoftimin e ministrisë, duke shtuar se ai ka nënçmuar shtetin që i dha mikpritjen diplomatike.
Ndërkohë, pak më pas erdhi edhe vendimi i Beogradit, ku Ministria e Punëve të Jashtme të Serbisë njoftoi se ajo veproi në një mënyrë reciproke duke e shpallur person “non grata” dhe duke dëbuar nga vendi Ambasadorin e Malit të Zi, Tarzan Milosheviç pasi i la 72 orë kohë të largohet nga vendi./Opinion.al
