Për Majlinda Bregun, deputeten demokrate që insiston se partia e saj ka probleme me lidershipin dhe organizimin strukturor, ka një dallim mes lidershipit të Lulzim Bashës dhe Sali Berishës.
Sipas saj, Berisha nuk merrte kurrë vendime pa i diskutuar ato më parë me kryesinë e partisë, gjë që me Bashën nuk po ndodh. Bregu shtoi se edhe emrin e kandidatit të zgjedhjeve në Dibër për PD, e mësoi përmes televizionit.
“Unë e bëj shumë lehtë dallimin mes Bashës dhe Berishës.
Kushdo të ishte pas Sali Berishës nuk mund të ishte fotokopje e Berishës. asnjëri nga ne nuk mund të krahsohet me vullnetin politik të Berishës, sepse është një njeri që politikën e ka jetën e tij.
Ne duhet ta ndajmë mendjen, Sali Berisha i ka dhënë mundësi Bashës që të jetë kryetar i PD. Nuk mbaj mend që Berisha të shkonte në zgjedhje pa diskutuar emrin e kandidatit në kryesinë e PD.
Flitej pavarësisht se si në fund ishte vendimi. Sot nuk po ndodh. Rasti i fundit, zgjedhjet në Dibër. Unë jam një njeri që e do të çlirët partinë demokratike. Por nuk mund ta pranoj që ta marr vesh emrin e kandidatit në televizion”-tha Bregu
