Duhet edhe një muaj nga mbajtja e Derbit të Madh të kryeqytetit, Partizani-Tirana, por dy tifozeritë ultrase kanë nisur që herët përgatitjet; vetëm se jo në planin sportiv por atë përplasjes fizike.
Pas sherrit të ndodhur në derbin e 19 –vjeçarëve ku dy tifozeritë u përplasën në tribunën e stadiumit “Qemal Stafa”, dje ka pasur një tjetër përplasje të dhunshme, e cila lëshon kambanën e alarmit për atë çka do të jetë derbi i madh i datës 5 mars.
Guerrilsat e Kuq dhe Fanatiksat Bardheblu, dy tifogrupet më të mëdha të Partizanit dhe Tiranës, janë përleshur dje pas përfundimit të ndeshjeve respektive të çerekfinaleve të kupes së Shqipërisë.
Fillimisht Guerrilsat kanë sulmuar Fanatiksat pas përfundimit të ndeshjes Tirana-Flamurtari, ndërsa vetëm disa orë me vonë Fanatiksat kanë marrë hak pas skualifikimit të Partizanit nga Laçi.
