Përplasje dhe “një luftë e hapur” mes presidentit Ilir Meta dhe kryebashkiakut, Erion Veliaj.
Ishte fillimisht kreu i shtetit, Ilir Meta, që pas sms-ve të publikuara nga Ylli Ndroqi me kryebashkiakun e Tiranës, Erion Veliaj, shprehu solidaritetin e tij me të gjithë gazetarët që sipas tij janë në presion brutal dhe shtoi se tmerri nga fjala e lirë është tipari kryesor i regjimeve kriminale që nuk e bazojnë qeverisjen mbi votën e lirë dhe fjalën e lirë, por në mbajtjen të shtypur dhe të frikësuar të popullit të tyre.
Presidenti shkoi më tej, duke iu kërkuar gazetarëve ta lajmëronin kur pronarët e tyre dorëzohen para shtetit, që të themelonin së bashku një media transparente të përbërë nga gazetarë kurajoz dhe që do ta nisin Kohën e Re me përmbysjen e këtij regjimi të neveritshëm mediatik që turpëron çdo njeri me minimum dinjiteti.
Pak çaste pas këtij postimi, reagoi vetë kryebashkiaku i Tiranës, Erion Veliaj, i cili iu përgjigj “flakë për flakë” duke postuar një foto të përgjimit me Dritan Priftin, u shpreh se Meta ka jo vetëm lekët, por edhe historinë e tij të 7 për qindshit, që mund ta mbajë gjallë këtë medie si me para ashtu dhe me permbajtje gjithë jetën.
Përplasja vijoi me një reagim nga Presidenca, ku zëdhënësi, Tedi Blushi, teksa e quan Veliajn “Lali Fiku”, shkruan se ai nuk vlen më as si gjethe fiku për ato çfarë po ndodhin me qeverinë.
Veliaj, ishte ndër të vetmit të rreshtuar në rradhët e Partisë Socialiste, që nuk ishte sulmuar më heret nga Presidenti Meta. Përplasjet e tyre të para publike ndodhën pas shembjes së Teatrit Kombëtar.
